අභාවප්රාප්ත ආර්. සම්බන්ධන් මහතා නිරතුරුවම නොබෙදුනු ශ්රී ලංකාවක් වෙනුවෙන් කැප වූ බවත් ජනාධිපති රනිල් වික්රමසිංහ මහතා පවසනවා.
ජනාධිපතිවරයා තවදුරටත් සඳහන් කළේ, ඔහු ද්රවිඩ ජනතාවගේ අයිතිවාසිකම් වෙනුවෙන් පමණක් නොව සමස්ත ශ්රී ලාංකික ජනතාවගේ අයිතිවාසිකම් වෙනුවෙන් පෙනී සිටි නායකයෙක් බවයි.
ජනාධිපති රනිල් වික්රමසිංහ මහතා මේ බව සඳහන් කර සිටියේ ආර්. සම්බන්ධන් මහතාගේ අවමංගල්ය අවස්ථාවට ත්රිකුණාමලය පිහිටි ඒ මහතාගේ නිවසේ දී අද (07) පස්වරුවේ එක් වෙමින්.
හිටපු විපක්ෂ නායකවරයෙක් මෙන්ම දෙමළ ජාතික සන්ධානයේ හිටපු නායක, ත්රිකුණාමලය දිස්ත්රික් පාර්ලිමේන්තු මන්ත්රී අභාවප්රාප්ත ආර්. සම්බන්ධන් මහතාගේ අවමංගල්ය උත්සවය පක්ෂ, විපක්ෂ දේශපාලන නායකයන් මැති ඇමතිවරු ඇතුළු විශාල ජනතාවගේ සහභාගිත්වයෙන් අද (07) පස්වරුවේ සිදු කෙරුණා.
ආර්. සම්බන්ධන් මහතාගේ අභාවය පිළිබඳ මෙහිදී සිය කණගාටුව පළ කළ ජනාධිපතිවරයා ඔහුගේ අභාවය තමාට දිගුකාලීන මිතුරෙකුගේ අහිමි වීමක් බවද සඳහන් කළා.
ආර්. සම්බන්ධන් මහතා නිරතුරුවම කථා කළ දෙමළ ජනතාවගේ ප්රශ්න විසඳීම වෙනුවෙන් කැපවී කටයුතු කරන බව මෙහිදී පැවසු ජනාධිපති රනිල් වික්රමසිංහ මහතා ජාතික ඉඩම් කොමිසමේ කෙටුම්පත මේ වන විට පාර්ලිමේන්තුවට ඉදිරිපත් කිරීමට සූදානම් කර තිබෙන බවත්, සිංහල, දෙමළ සහ මුස්ලිම් ජනතාවට වන සංරක්ෂණ දෙපාර්තමේන්තුව සමඟ තිබෙන ප්රශ්න නීතියෙන්ම විසඳීමට එම කොමිසමට බලයට ලබා දීමට බලාපොරොත්තු වන බවත් පවසා සිටියා.
කොළඹ පෞද්ගලික රෝහලක ප්රතිකාර ලබමින් සිටියදී පසුගිය ඉරිදා රාත්රියේ ආර්.සම්බන්ධන් මහතා අභාවප්රාප්ත වුණා.
මිය යන විට 91 වැනි වියේ පසුවූ ඒ මහතා වසර ගණනාවක් පාර්ලිමේන්තුව නියෝජනය කළ අතර වරක් විපක්ෂ නායක ධුරය ද හොබවනු ලැබුවා.