තමාව අත්අඩංගුවට ගැනීම අභියෝගයට ලක් කරමින් අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ, ජ්‍යෙෂ්ඨ පොලිස් අධිකාරි ශානි අබේසේකර මහතා වෙනුවෙන් නීතිඥ ගෞරි තවරාසා මහත්මිය දෙසැම්බර් 09 වන දින ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනු කර ඇත.
අදාල මූලික අයිතිවාසිකම් පෙත්සම ගොනු කර ඇත්තේ කිසිදු සාධාරණ හේතුවක් නොමැතිව අබේසේකර මහතාව අත්අඩංගුවට ගෙන රක්ෂිත බන්ධනාගාරගත කර තැබීමෙන් ඔහුගේ මූලික අයිතිවාසිකම් කඩවී ඇති බව පවසමින්ය.
ඒ වෙනුවෙන් රුපියල් මිලියන 3 ක වන්දියක් ගෙවීමට බලධාරීන්ට නියෝග කරන්නැයි පෙත්සමෙන් ඉල්ලා ඇත.
ශානි අබේසේකර මහතාව රිමාන්ඩ් බන්ධනාගාරයෙන් විමර්ශන කටයුතු සඳහා හෝ වෙනත් ඕනෑම කටයුත්තක් සඳහා පිටතට ගෙන යන්නේ නම් ඔහුගේ ආරක්ෂාව තර කරන්නැයි පොලිස්පතිවරයාට නියෝගයක් කරන ලෙස ද පෙත්සමෙන් ඉල්ලා ඇති අතර එහි වගඋත්තරකරුවන් ලෙස නම් කර ඇත්තේ, පොලිස්පතිවරයා, කොළඹ අපරාධ කොට්ඨාසයේ ස්ථානාධිපතිවරයා හා නීතිපතිවරයාය.
තවද අබේසේකර මහතාගේ ඇප ඉල්ලුම් පත්‍රය ගම්පහ අංක 01 මහාධිකරණ විනිසුරු නිමල් රණවීර මහතා දෙසැම්බර් 09 වන දින ප්‍රතික්ෂේප කළ අතර ඇඹිලිපිටිය පොලීසියට අනුයුක්තව සේවය කළ උපපොලිස් පරීක්ෂක සුගත් මෝහන මෙන්ඩිස් මහතාගේ ඇප ඉල්ලුම් පත්‍රයද විනිසුරුවරයා ප්‍රතික්ෂේප කරනු ලැබුවේ ය.
ශානි අබේසේකර සහ සුගත් මෙන්ඩිස් යන මහත්වරුන්ව අත්අඩංගුවට ගෙන තිබුණේ ව්‍යාජ සාක්ෂි නිර්මාණය කර අධිකරණය නොමග යැවීම ඇතුළු චෝදනා යටතේය.
කෙසේ වෙතත් ඔවුන්ට ඇප ලබා දෙන්නයැයි ඉල්ලා ජනාධිපති නීතිඥ වසන්ත නවරත්න බණ්ඩාර මහතා ඇතුළු තවත් නීතිඥ කණ්ඩායමක් ගම්පහ මහාධිකරණයට හමුවේ ඇප අයැදුම්පත් ගොනු කර තිබුණි. කෙසේ වෙතත් නීතිපති දෙපාර්තමේන්තුව වෙනුවෙන් අධිකරණයට කරුණු දැක්වූ නියෝජ්‍ය සොලිසිටර් ජෙනරාල් ශනිල් කුලරත්න මහතා අදාල ඇප ලබා දීම්වලට විරෝධතා ඉදිරිපත් කර තිබු අතර දෙපාර්ශවයේම කරුණු සලකා බැලු මහාධිකරණ විනිසුරුවරයා සැකකරුවන්ට ඇප ලබාදීම ප්‍රතික්ෂේප කර ඇත.
