වසර 33 කට පසුව කාන්තා මීටර් 100 ඉසව්වේ වාර්තා වූ හොදම කාලය වාර්තා කරමින් ජැමෙයිකාවේ ශෙලී ඈන් ෆ්‍රේසර් ප්‍රයිස් (Shelly Ann Fraser Pryce) පසුගිය සෙනසුරාදා (05) කිංස්ටන්හි (Kingston) පැවති තරඟාවලියකදී ලොව දෙවන වේගවත්ම කාන්තාව බවට පත්විය .
ශෙලී ඈන් ෆ්‍රේසර් ප්‍රයිස් මෙම මීටර් 100 ඉසව්ව තත්පර 10.63 කින් නිම කළ අතර ඇය දෙවනි වන්නේ ඇමරිකානු කෙටිදුර ධාවන ශූරී ෆ්ලොරන්ස් ග්‍රිෆිත් ජොයිනර්ට (Florence Griffith Joyner) පමණි .
1988 දී අවස්ථා තුනකදී ෆ්ලොරන්ස් ග්‍රිෆිත් ජොයිනර් මීටර් 100 ඉසව්ව තත්පර 10.49, 10.61 සහ 10.62 ලෙසින් නිම කර ඉතිහාසයේ හොදම කාලය ලෙස වාර්තා තබා ඇත.
ඒ අනුව ශෙලී ඈන් ෆ්‍රේසර් ප්‍රයිස්ගේ 10.63 ක කාලය ඉතිහාසයේ සිව්වන හොදම කාලයයි.
තවද එය කාන්තා මීටර් 100 ඉසව්වේ නව ජැමෙයිකානු වාර්තාව ද වේ.
මීට පෙර කාන්තා මීටර් 100 ඉසව්ව තත්පර 10.70 කින් නිමකර සම ජැමෙයිකානු වාර්තාවට හිමිකම් කීවේ ශෙලී ඈන් ෆ්‍රේසර් ප්‍රයිස් සහ 2016 ඔලිම්පික් ශූර එලේන් තොම්සන් හේරා (Elaine Thompson Herah)ය.
34 හැවිරිදි ශෙලී ඈන් ෆ්‍රේසර් ප්‍රයිස් ඉදිරියේදී පැවැත්වීමට නියමිත ටෝකියෝ ඔලිම්පික් උළෙලේදී එක් තනි ධාවන පථයක් හා ක්ෂෙත්‍ර ඉසව්වක් තුන්වතාවක් දිනාගත් පළමු කාන්තාව බවට පත්වීමටත්, තනි ඔලිම්පික් ස්ප්‍රින්ට් ශූරතාව (Individual Olympics Sprint Title) දිනාගන්නා වයස්ගතම කාන්තාව බවට පත්වීමට නියමිත බව ක්‍රීඩා විචාරකයන් මත ඵල කරයි.දෙවතාවක් ඔලිම්පික් කාන්තා මීටර් 100 ශූරියක් වන ශෙලී ඈන් ෆ්‍රේසර් ප්‍රයිස් මෙලෙස නැවත තරඟාබිමට පිවිසෙන්නේ දරු ප්‍රසුතියෙන් පසුව වීම සුවිශේෂීය .
