ඉදිරි ජාතික මැතිවරණයට තරග කිරීම සඳහා සමගි ජන බලවේගය නව සන්ධානයක් පිහිටුවීමට මේ වන විට සංවාදයක නිරතව සිටින බවට වාර්තා වනවා.
ඒ අනුව එක්සත් ජාතික පක්ෂය සහ එහි නායක ජනාධිපති රනිල් වික්‍රමසිංහ මෙම සන්ධානයට මිත්‍ර පාක්ෂිකයින් ලෙස එක්වීම සාදරයෙන් පිළිගන්නා බව සමගි ජනබලවේගයේ පාර්ලිමේන්තු මන්ත්‍රී නලීන් බණ්ඩාර මහතා පවසනවා.
“නව සන්ධානය සමගි ජනබලවේගය පක්ෂය ප්‍රමුඛ සන්ධානයක් වන අතර ජනාධිපති රනිල් වික්‍රමසිංහ මහතාට සහ එක්සත් ජාතික පක්ෂයට මෙම සන්ධානයට එක්විය හැකියි. එක්සත් ජාතික පක්ෂයට සුළුතර පක්ෂයක් ලෙස සමගි ජනබලවේගය ප්‍රමුඛ සන්ධානයට එක්විය හැකියි” යනුවෙන් පාර්ලිමේන්තු මන්ත්‍රී නලින් බණ්ඩාර ජයමහ මහතා ප්‍රවෘත්ති සාකච්ඡාවකදී සදහන් කළා.
එමෙන්ම ඔහු පවසන්නේ එක්සත් ජාතික පක්ෂය ඡන්ද පදනමක් නැති නිසා එය සුළු ජාතික පක්ෂයක් පමණක් බවයි.
විපක්ෂ නායක සජිත් ප්‍රේමදාස මහතා මෙම නව මහා සන්ධානයේ ජනාධිපති අපේක්ෂකයා වන අතර ඔහුව විපක්ෂයේ පොදු අපේක්ෂකයා ලෙසද කෙනෙකුට හැඳින්විය හැකි බව නලීන් බණ්ඩාර මහතා වැඩිදුරටත් පවසනවා.
