මෙවර ජනාධිපතිවරණයට ඉදිරිපත්වී ඇති අපේක්ෂකයින් 39 දෙනා අතරින් මේ වන විට අඩුමතරමින් කුඩා රැස්වීමක් හෝ පවත්වා ඇත්තේ අපේක්ෂකයින් 15 දෙනෙක් පමණක් බව ප්‍රජාතන්ත්‍රීය ප්‍රතිසංස්කරණ හා මැතිවරණ අධ්‍යයන ආයතනයේ විධායක අධ්‍යක්ෂ මංජුල ගජනායක මහතා පවසනවා.
පෞදග්ලික රූපවාහිනි නාලිකාවක් සමඟ පැවති සාකච්ඡාවකට එක්වෙමින් ඔහු මේ බව සඳහන් කළා.
එමෙන්ම, ජනාධිපතිවරණය සඳහා නාමයෝජනා ලබාදුන් අපේක්ෂකයින් තිදෙනෙකු පිළිබඳ කිසිදු තොරතුරක් නොමැති බවද ඔහු මෙහිදී පෙන්වා දී තිබුණා.
ජනාධිපතිවරණයට ඉදිරිපත් වන අපේක්ෂකයින් අතුරින් එක් අයෙක් ජීවිතක්ෂයට පත්ව ඇති අතර ඔහු වෙනුවෙන් මේ වන තෙක් කිසිඳු ආදේශක පුද්ගලයෙක්ද නම් කිරීමක් සිදු කර නොමැති බවද මංජුල ගජනායක මහතා පවසනවා.
එමෙන්ම, ජනාධිපතිවරණයට ඉදිරිපත්වී ඇති ඉතිරි පුද්ගලයින් 23 දෙනාගෙන් තිදෙනෙක් සම්බන්ධ කර ගැනීමට හෝ ඔවුන් ලබාදී ඇති දුරකථන අංක හෝ නොමැති බවත් ඉන් පුද්ගලයින් 5 දෙනෙකුට අඩුම තරමේ සමාජ මාධ්‍ය ගිණුමක් හෝ නොමැති බවද මංජුල ගජනායක මහතා මෙහිදී පෙන්වා දුන්නා.
එසේම ඉන් පුද්ගලයින් තිදෙනෙක් තමන් ජනාධිපතිවරණයට තරග කරන බවට හෝ මාධ්‍ය වෙත කිසිදු ප්‍රකාශයක් සිදුකර නොමැති බවද මංජුල ගජනායක වැඩිදුරටත් සඳහන් කළා.
