බැංකු ක්‍රමයට පිටතින් විදෙස් මුදල් හුවමාරුව පාලනය සඳහා ඉදිරියේදී පියවරයන් කිහිපයක් ගැනීමට තීරණය කර ඇති බව ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ මහතා පවසනවා.
ඒ, ඊයේ (29) දින මාධ්‍ය අමතමින්.
බැංකු ක්‍රමයට පිටතින් උණ්ඩියල් සහ හවාලා යන ක්‍රමවේද ඔස්සේ සිදුවන විදේශ විනිමය හුවමාරු සම්බන්ධව යම් තීරණ ගත යුතු බවයි ඔහු පවසන්නේ.
බැංකු ක්‍රමවේදයට පිටතින් ගොස් භාණ්ඩ ආනයනය සඳහා ඉහත ක්‍රමවේද හරහා විදෙස් විනිමය ගෙවීමත් සිදුකෙරෙන බව හඳුනාගෙන ඇති බවත් එය පාලනය කිරීම සඳහා හැකි ඉක්මනින් චක්‍රලේඛයක් නිකුත් කරන බවත් මහ බැංකු අධිපතිවරයා පවසනවා.
“භාණ්ඩ ආනයනය කරන අය සහ විදෙස් මුදල් මෙරටට එවන අය එය බැංකු පද්ධතිය හරහා කරන්න. එවිට බැංකු පද්ධතියට ඩොලර් ලැබෙනවා. එවිට එය ආර්ථිකයට හොඳයි.” යැයි ඔහු පවසනවා.
එමෙන්ම, රටේ ආර්ථික අර්බුදය යම් මට්ටමකට විසඳාගන්නා තෙක් ශ්‍රී ලංකාවට උපකාර කිරීමට ඉන්දීය රජය එකඟ වූ බවත් ඔහු සඳහන් කර සිටියා.
