කොවිඩ් -19 ආසාදිත බවට සැකසහිත ගිරිඋල්ල – පුස්කොලදෙණිය ප්‍රදේශයේ පුද්ගලයෙකුගේ නිවසකට රාජකාරී කටයුතු සඳහා පැමිණි මහජන සෞඛ්‍ය පරීක්ෂකවරයෙකුට ඊයේ (03) කෙළ ප්‍රහාරයක් එල්ලවී තිබෙනවා.
ඒ නාරම්මල සෞඛ්‍ය වෛද්‍ය නිලධාරී කාර්යාලයේ මහජන සෞඛ්‍ය පරීක්ෂකවරයෙකුටයි.
සැකසහිත පුද්ගලයා සිටින නිවසට ගිය අවස්ථාවේදී එම පුද්ගලයාගේ පියා විසින් මහජන සෞඛ්‍ය පරීක්ෂකවරයාගේ රාජකාරියට බාධා කරමින් පහරදීමට තැත්කර තිබෙනවා.
අනතුරුව ඔහු මහජන සෞඛ්‍ය පරීක්ෂකවරයාට කෙළ ගසා ඇති බව පොලිස් මාධ්‍ය ප්‍රකාශක, ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා පවසනවා.
48 හැවිරිදි මෙම පුද්ගලයා සිදුවීම වන අවස්ථාවේදී මත්පැන් පානය කර සිටි බවට වාර්තා වූ බව පොලිස් මාධ්‍ය ප්‍රකාශකවරයා පවසනවා.
ඒ අනුව ගිරිඋල්ල පොලීසිය විසින් අදාළ සැකකරුව අත්අඩංගුවට ගෙන තිබේ.
2020 වසරේ දෙසැම්බර් 02වනදා මේ ආකාරයෙන්ම සිද්ධියක් බණ්ඩාරගම අටලුගම ප්‍රදේශයෙන්ද වාර්තා වුණා.
එම සිදුවීමේදී අත්අඩංගුවට ගෙන අධිකරණයට ඉදිරිපත් කළ සැකකරුට පානදුර අධිකරණය විසින් වසර 6ක සිරදඬුවමක් නියම කළා.
