ලංකාවත් සයිබර් ලිංගික අපහරණවල තෝතැන්නක්..!

වින්ධිතයන්ගේ පිරමීඩාකාර ජාල භාවිතා කරගත් සයිබර් ලිංගික අපරාධ කොරෝනා කාලයේදී ඉහළ ගොස් ඇතැයි කොළඹ අපරාධ කොට්ඨාසය (සී.සී.ඩී) සඳහන් කරයි.

වින්ධිතයන් තවදුරටත් බියගන්වා ඔවුන්ගේ නෑ සිය මිතුරන්ගේ නිරුවත් ඡායාරූප හා වීඩියෝ එකතු කිරීම මෙහිදී සිදුවන්නේ යැයි ද එසේ ලබාගත් නිරුවත් ඡායාරූප හා වීඩියෝ පට ව්‍යාපාරික අරමුණෙන් කාමෝද්දීපන වෙබ් අඩවි සඳහා විකිණීමෙන් විශාල ධනයක් උපයන කණ්ඩායම් නිර්මාණය වී ඇතැයි ද සී.සී.ඩීයේ ජ්‍යෙෂ්ඨ නිලධාරියෙක් ඩේලි මිරර් පුවත්පතට පවසා ඇත.

කෙසේ වෙතත් අතිනවීන තාක්ෂණික උපක්‍රම අනුගමනය කිරීම නිසා මෙම අපරාධකරුවන් හඳුනාගැනීම අපහසු වී ඇති අතර ඊට පොලිස් සේවයේ තාක්ෂණික ඥානය මදකම ද බලපා ඇත.

ශ්‍රී ලංකා පරිගණක හදිසි ප්‍රතිචාර සංසදය පවසන ආකාරයට සමාජ මාධ්‍ය හා අන්තර්ජාලය පදනම් කරගත් අපරාධ පසුගිය වසරේදී විශාල ලෙස ඉහළ ගොස් තිබේ.

ඊට අනුව 2019 දී 2662ක් වූ එවැනි සිදුවීම් පසුගිය 2020 වසරේදී 14 284 ක් දක්වා ඉහළ ගොස් ඇත.

(අංජන කොළඹගේ)