මැදවච්චිය පොලිසියේ රථවාහන කොට්ඨාශයේ නිලධාරීන් විසින් තරුණයෙකුට පහරදීමේ සිද්ධිය සම්බන්ධයෙන් කඩිනම් මෙන්ම විනිවිදභාවයෙන් යුතුව ක්‍රියා මාර්ග ගන්නා ලෙස ශ්‍රී ලංකා නීතීඥ සංගමය (BASL) ඉල්ලා සිටිනවා.
අනුරාධපුරය, මැදවච්චිය ප්‍රදේශයේ දී තරුණයෙකුට එල්ල වූ බව කියන ම්ලේච්ඡ පොලිස් ප්‍රහාරයේ ප්‍රතිඵලයක් ලෙස ඔහු අප්‍රේල් 9 වැනිදා අනුරාධපුර ශික්ෂණ රෝහලේදී සැත්කමට භාජනය වූ අතර එහිදී එම තරුණයාගේ එක් වෘෂණ කෝෂයක් ඉවත් කිරීමට සිදුව තිබුණා.
නිවේදනයක් නිකුත් කරමින් ශ්‍රී ලංකා නීතීඥ සංගමය අවධාරණය කරන්නේ මෙම අපරාධයට වග කිව යුත්තන් සියලු පාර්ශවයන්ට එරෙහිව උපරිම ලෙස නීතිය ක්‍රියාත්මක කළ යුතු බවයි.
සිය නිල රාජකාරි කරමින් සිටින අතරතුර පොලීසිය විසින් පුරවැසියන් වෙත ඕනෑම ආකරයකින් කෲරත්වය මුදා හැරීම නීතීඥ සංගමය තරයේ හෙළා දකිනවා.
මෙම සිදුවීම සම්බන්ධයෙන් දැඩි අවධානයෙන් පසුවන බවත් මෙවැනි නින්දිත ක්‍රියා නැවත සිදු නොවීමට අවශ්‍ය සියලුම නීතිමය ක්‍රියාමාර්ග ගන්නා ලෙස බලධාරීන්ගෙන් ඉල්ලා සිටින බව ශ්‍රී ලංකා නීතීඥ සංගමය එම නිවේදනයේ සඳහන් කර තිබෙනවා.
