සුනිල් පෙරේරා යනු තමන් විශ්වාස කරන අදහස් උදහස් වෙනුවෙන් පෙනී සිටීමට කිසි විටක පසුබට නොවූ පුද්ගලයෙකු බව අග්‍රාමාත්‍ය මහින්ද රාජපක්ෂ මහතා පවසනවා.
ඒ, ප්‍රවීණ ගායන ශිල්පී සුනිල් පෙරේරා මහතාගේ අභාවය සම්බන්ධයෙන් සිය ශෝකය පළ කරමින්.
ජනප්‍රිය ගායක සුනිල් පෙරේරා මහතා මෙරට සංගීත ක්ෂේත්‍රයෙහි ප්‍රබල භූමිකාවක් නිරූපනය කළ බවත් ඔහුගේ අභාවය පිළිබඳ අසා තමන් මහත් සේ කණගාටුවට පත් වූ බවත් අග්‍රාමාත්‍යවරයා සිය ෆේස්බුක් ගිණුමේ සටහනක් තබමින් පවසා සිටිනවා.
මෙරට ප්‍රාසාංගික වේදිකාවට සුනිල් පෙරේරා නොමැති අඩුව තදින්ම දැනෙනු ඇති නමුත් සිය සංගීත නිර්මාණ ඔස්සේ හැමදාමත් ඔහු අප අතර ජීවමාන වනු ඇති බවත් ඒ මහතාගේ අභාවය නිසා ශෝකයට පත් පවුලේ සැමටත් රසික ජනතාවටත් සිය සංවේගය ප්‍රකාශ කරන බවත් අග්‍රාමාත්‍ය මහින්ද රාජපක්ෂ මහතා පවසනවා.
මේ අතර ජනාධිපති ගෝඨාභය රාජප්ක්ෂ මහතාද සිය ෆේස්බුක් ගිණුමේ සටහනක් තබමින් පවසා සිටින්නේ කණ්ඩායම් සංගීතයේ නව පෙරළියක් ඇති කරමින්, අදටත් එක සේ ජනප්‍රිය ගීත රැසක් ශ්‍රී ලාංකේය සංගීත ක්ෂේත්‍රයට දායාද කළ ප්‍රවීණ ගායන ශිල්පී සුනිල් පෙරේරා මහතාගේ අභාවය පිළිබඳව තමන් සිය සාතිශය සංවේගය ප්‍රකාශ කර සිටින බවයි.
කොරෝනා ආසාදිත ව ප්‍රතිකාර ලබමින් සිට සුව වී නිවසට පැමිණි ප්‍රවීණ ගායන ශිල්පී සුනිල් පෙරේරා මහතා, නැවත මතු වූ සංකූලතාවක් හේතුවෙන් මීට දින තුනකට පෙර රෝහල්ගත කරනු ලැබුවා. අසාධ්‍ය තත්ත්වයේ පසූ වූ ඔහු මෙලොවින් සමුගත් බව ඔහුගේ පවුලේ සාමාජිකයින් දැනුම් දුන්නේ අද දින අලුයමදීයි.
කණ්ඩායම් සංගීත ක්ෂේත්‍රයේ පෙරගමන්කරුවෙකු වූ ජිප්සීස් කණ්ඩායමේ නායක සුනිල් පෙරේරා මහතා තමාටම ආවේණික වූ ශෛලයකින් කටහඬ මෙහෙයවමින් ජනහද දිනා ගැණීමට සමත් විය.
ලුණු දෙහි, පාවෙන පීරිසියක්, තාත්තා මට ඇනපු ටොක්ක, පිටි කොටපන්, සයිමා කට්වෙලා, අංකල් ජොන්සන් වැනි ජනප්‍රිය ගීත අදටත් ඔහුගේ හඬ පෞරුෂත්වය ජීවමාන කිරීමට සමත් වේ.
