පැවති ජනාධිපතිවරණයේදී සජිත් ප්‍රේමදාස මහතාට සහය පල කළ ශ්‍රී ලංකා නිදහස් පක්ෂයේ ආසන සංවිධායකවරු පිරිසක් ඉදිරි මහ මැතිවරණයේදී ජාතික ජනබලවේගයට සහය දීමට තීරණය කර තිබෙනවා.
ශ්‍රී ලංකා නිදහස් පක්ෂයේ කැස්බෑව ආසන සංවිධායක නීතීඥ කීර්ති උඩවත්ත මහතා ප්‍රවෘත්ති සාකච්ඡාවකදී අදහස් දක්වමින් මේ බව සඳහන් කළා.
සජිත් ප්‍රේමදාස මහතාට සහය දැක්වීමට ගත් තීරණය වැරදි බව මේ වන විට වටහාගෙන ඇති බවත්, ඒ අනුව ප්‍රාදේශීය මට්ටමේ දේශපාලන නායකත්වයට ජාතික ජන බලවේගයේ දේශපාලන යාන්ත්‍රණය සමඟ සම්බන්ධ වීමට වැඩ පිලිවෙලක් සකස් කර දෙන ලෙසත් ඔවුන් ජනාධිපති අනුර කුමාර දිසානායක මහතාගෙන් ඉල්ලා සීටිනවා.
“දැන් අපට තේරෙනවා, එදා අපි ගත්තු තීරණය වැරදියි කියලා, අපි මෙහිදී ජාතික ජනබලවේගයට උදව් කරන්නේ, අපිට ප්‍රාදේශීය මට්ටමේ දේශපාලන නායකත්වයක් තියෙනවා, අපිට ඔබේ යාන්ත්‍රණයට සම්බන්ධ වෙන්න වැඩපිළිවෙලක් සකස් කරල දෙන්න..”
මෙහිදී අදහස් දැක්වූ කඩුවෙල ආසන සංවිධායක හෙක්ටර් බෙත්මගේ සඳහන් කළේ මේ වන විට ශ්‍රී ලංකා නිදහස් පක්ෂයේ ආසන සංවිධායකවරු 40ක් පමණ අනුර කුමාර දිසානායක මහතා සමඟ අත්වැල් බැඳගැනීමට කැමත්ත පළ කර ඇති බවයි.
“අපි සංවිධානය වෙලා සාධනීය ප්‍රතිපත්ති තියෙන ජනාධිපති අනුර කුමාරව ආරක්ෂා කරගන්න අපි පෙළගැහෙන්න ඕන කියලා ඔවුන් කිව්වා, ඒ නිසා තමා මාලිමාවේ ජයග්‍රහණය විජයග්‍රහණය කරන්න මාලිමාවට ඡන්දෙ දෙන්න කියන පණිවිඩය අපි ඔබ ඉදිරියට ගෙනාවේ”
පසුගිය සමයේදී අනුර කුමාර දිසානායක මහතා විවේචනය කරමින් සිදු කළ ප්‍රකාශ සහ මේ වන විට ඔහුට සහය ලබා දීමට ගත් තීරණය සම්බන්ධයෙන් මෙහිදී මාධ්‍යවේදියෙකු විමසූ අවස්ථාවේදී හෙක්ටර් බෙත්මගේ මහතා සඳහන් කළේ ප්‍රඥාව යනු ඇතැම් විටෙක යටපත් වී තිබී නැවත ඉස්මතු වෙන දෙයක් බවයි.
