ශ්රී ලංකා ටෙලිකොම් ආයතනයේ රජය සතු කොටස් ප්රතිව්යුහගත කිරීම සඳහා අමාත්ය මණ්ඩලය ගෙන තිබෙන තීරණයෙන් මුලික අයිතිවාසිකම් උල්ලංඝනය වන බවට තීන්දුවක් ලබාදෙන ලෙස ඉල්ලා ගොනුකළ මුලික අයිතිවාසිකම් පෙත්සම් දෙකක් විභාගයට නොගෙන නිෂ්ප්රභ කිරීමට ශ්රේෂ්ඨාධිකරණය ඊයේ (15) තීන්දු කළා.
ටෙලිකොම් ආයතනය පෞද්ගලීකරණය කිරීමට එරෙහිව ශ්රී ලංකා සමස්ත විදුලි සංදේශ සේවක සංගමයේ සභාපති ජේ. බී. ගුරුසිංහ සහ ලේකම් එච්. කේ. හෙට්ටිආරච්චි සහ ශ්රී ලංකා ටෙලිකොම් සමගි සේවක සංගමයේ සභාපති ඉන්දික ප්රියදර්ශන විසින් මෙම පෙත්සම් ඉදිරිපත් කර තිබුණා.
එම පෙත්සම් දෙක සලකා බැලීමෙන් අනතුරුව මුර්දු ප්රනාන්දු, කුමුදුනී වික්රමසිංහ සහ ප්රියන්ත ප්රනාන්දු යන ත්රිපුද්ගල ශ්රේෂ්ඨාධිකරණ විනිසුරු මඩුල්ල මෙම නියෝගය නිකුත් කර ඇති බවයි වාර්තා වන්නේ.
පෙත්සම සලකා බැලු අවස්ථාවේදී නියෝජ්ය සොලිසිටර් ජනරාල් රජීව ගුණතිලක මහතා අධිකරණය හමුවේ කරුණු දක්වමින් ප්රකාශ කළේ ටෙලිකොම් ආයතනය ප්රතිව්යුහගත කිරීමේ ක්රියාවලිය සඳහා පසුගිය මාර්තු මස අමාත්ය මණ්ඩලයේ අනුමැතිය හිමිවී ඇති බවයි.
ඒ සම්බන්ධව ජනමාධ්ය ඔස්සේ ජනතාව දැනුවත් කළ බවද ඔහු අධිකරණය හමුවේ කියා සිටියා.
තවද පාර්ලිමේන්තුවේ මුදල් අමාත්යවරයා සිදුකළ අයවැය ප්රකාශය තුළද මෙම කරුණු සඳහා අනුමැතිය ලැබී ඇති බව ඔහු එහිදී සඳහන් කළා.
ටෙලිකොම් ආයතනය ප්රතිව්යුහගත කිරීමේ ක්රියාවලිය හරහා ජාතික ආරක්ෂාවට තර්ජනයක් එල්ල වන බවට මෙම පෙත්සම්වලින් චෝදනා කර තිබු අතර එම චෝදනාවේ කිසිඳු පදනමක් නොමැති බව සඳහන් කළ නියෝජ්ය සොලිස්ටර් ජනරාල්වරයා පෙන්වා දුන්නේ ජනරාල්වරයා බ්රිතාන්යය ඇතුළු ලෝකයේ ප්රධාන රටවල් ගණනාවකම විදුලි සන්දේශ කටයුතු පෞද්ගලීකරණය කර තිබෙන බවයි.
පෙත්සම්කරුවන් ඉල්ලා සිටින ආකාරයට අතුරු නියෝගයක් ලබාදුන හොත් විදෙස් ආයෝජකයින් මෙරටට පැමිණීම මඟහැර වෙනත් රටවල් කරා ඇඳී යාමට හැකියාව ඇති බව මෙහිදී නියෝජ්ය සොලිස්ටර් ජනරාල්වරයා අධිකරණය හමුවේ කරුණු පෙන්වා දී තිබෙනවා.
ටෙලිකොම් ආයතනයේ කොටස්කරුවන්ටත් එහි ග්රාහකයින්ටත් අගතියක් මෙම ක්රියාවලිය හරහා වන බවට පෙත්සම්වලින් චෝදනා කර තිබුණද එය පදනම් විරහිත ප්රකාශයක් බවයි ඔහු ප්රකාශ කර සිටින්නේ.
නියෝජ්ය සොලිස්ටර් ජනරාල්වරයා සඳහන් කළේ මෙම ක්රියාදාමය හරහා ලැබෙන වාසිය ටෙලිකොම් ආයතනයට පමණක් නොව එහි කොටස්කරුවන්ටත්, ග්රාහකයින්ටත් හිමිවන අතර මෙය සැමටම ජයග්රහණය ගෙන දෙන වැඩපිළිවෙලක් බවයි.
මේ අනුව මෙම ක්රියාවලියෙන් පෙත්සම්කරුවන්ගේ මුලික මිනිස් අයිතිවාසිකම් උල්ලංඝනය වන බැවින් මෙම පෙත්සම විභාගයට නොගෙන නිෂ්ප්රභ කරන ලෙස නියෝජ්ය සොලිසිටර් ජනරාල්වරයා අධිකරණයෙන් ඉල්ලා සිටියා.
ඉදිරිපත්වූ සියලු කරුණු සලකා බැලීමෙන් අනතුරුව අධිකරණය විසින් මෙම තීන්දුව ලබා දී තිබෙනවා.