ඇමරිකානු තානාපතිනිය විසින් අමාත්‍ය සුසිල් ප්‍රේමජයන්තව හෑල්ලුවට ලක් කළ බව හිටපු අමාත්‍ය විමල් වීරවංශ පවසනවා.
ඒ, අද දින පාර්ලිමේන්තුවේදී අදහස් දක්වමින්.
පසුගිය දිනක ආධාර තොගයක් භාර දීමේ උත්සවයකදී ඇමරිකානු තානාපතිනිය විසින් අමාත්‍ය සුසිල් ප්‍රේමජයන්තගේ දෑතට කවුපි දමන ආකාරය දැකගත හැකි වූ බවත් අමාත්‍යවරයා සිඟන්නෙකු සේ දෑත දිගු කර සිටි බවත් විමල් වීරවංශ එහිදී පවසා සිටියා.
ඊට පිළිතුරු දෙමින් පාර්ලිමේන්තුවේ සභානායක සහ අධ්‍යාපන අමාත්‍ය සුසිල් ප්‍රේමජයන්ත පවසා සිටියේ එක්සත් ජනපදයේ කෘෂිකර්ම දෙපාර්තමේන්තුව (USAD) හරහා Save the Children සමග සහයෝගිතාවෙන් සැමන්, පරිප්පු ඇතුළු වියළි ආහාර ලබා දුන්නේ දරුවන්ගේ පෝෂණ මට්ටම ඉහළ නැංවීමට බවත් මෙරට ආර්ථික අර්බුදය හේතුවෙන් ළමා මන්ද පෝෂණය ඉහළ ගොස් තිබීම ලෝකයේම අවධානයට ලක්ව ඇති බවත් ය.
මෙහිදී වැඩිදුරටත් අදහස් දැක්වූ අමාත්‍යවරයා.
“ඒක භාරගන්න තමයි මම ගියේ. ඒක අවඥාවට ලක් කරනවා. මම හිඟාකාලා හරි මේ රටේ ළමයින්ට ආහාරවේලක් දෙන්න පුළුවන් නම් දෙනවා කියන එක මේ රටේ ජනතාවට කියනවා නිකන් පම්පෝරි ගහන්නෙ නැතිව. බැංකුවෙන් ණයක් අරන් හදපු ගෙදර මම ඉන්නෙ. හැබැයි සමහරුන්ට ගෙවල් හැදුවයි කියලා වත්කම් ප්‍රකාශ කළේ වැරදියටයි කියලා නඩු තියෙනවා. මේ ඇමතිකම හෙට නැති උනත් මම යන්නෙ උසාවියට. ඔය කියන අයට යන්න තැනක් නෑ”
