ව්‍යාපාරික සුරේන්ද්‍ර වසන්ත පෙරේරා නොහොත් ක්ලබ් වසන්ත ඝාතනයට අදාළව අත්අඩංගුවට ගත් ටැටූ මධ්‍යස්ථානයේ හිමිකරු ඇතුළු සැකකරුවන් 07 දෙනා රක්ෂිත බන්ධනාගාරගත කර තිබෙනවා.
සැකකරුවන් කඩුවෙල මහෙස්ත්‍රාත් අධිකරණය හමුවට අද (10) ඉදිරිපත් කිරීමෙන් පසුව එළඹෙන 22 වනදා දක්වා රිමාන්ඩ් භාරයට පත් කළ බව පැවසෙනවා.
මෙම සැකකරුවන් කඩුවෙල මහෙස්ත්‍රාත් අධිකරණය හමුවට රැගෙන එන අවස්ථාවේදි අධිකරණය ආසන්නයේ හා ඒ අවට ප්‍රදේශයට දැඩි ආරක්‍ෂාවක්ද යොදා තිබුණා.
ක්ලබ් වසන්ත, පසුගිය සඳුදා (08) අතුරුගිරියේ පිහිටි ටැටූ මධ්‍යස්ථානයකදී සිදුකළ වෙඩි තැබීමකින් ජීවිතක්ෂයට පත්වුණා.
එම අවස්ථාවේ එහි සිටි ප්‍රසිද්ධ ගායන ශිල්පිනී කේ. සුජීවාගේ සැමියා වන නයන වාසුල නමැත්තාද මියගිය අතර කේ.සුජීවා, ක්ලබ් වසන්තගේ බිරිය, තවත් කාන්තාවක් හා පිරිමි පුද්ගලයෙකු තුවාල ලබා රෝහල්ගත කළ අතර ඔවුන් මේ වන විට කළුබෝවිල හා ජාතික රෝහලේ ප්‍රතිකාර ලබනවා.
