බිංගිරිය කම්හල් පරිශ්‍රයක් තුළ ඊයේ (30) දින ජාතික ජන බලවේගයේ මන්ත්‍රීවරුන් දෙදෙනා මුහුණ දුන් සිදුවිම සම්බන්ධයෙන් අත්අඩංගුවට ගත් සැකකරුවන් දෙදෙනා රක්ෂිත බන්ධනාගාරගත කර තිබෙනවා.
එහිදී සැකකරුවන් දෙදෙනා හෙට්ටිපොළ මහෙස්ත්‍රාත් අධිකරණයට ඉදිරිපත් කෙරුණු අතර වැඩබලන මහෙස්ත්‍රාත් ඒ. සී. ඒ. සලාම් මහතා සැකකරුවන් දෙදෙනා ජනාවාරි මස 7වන දින දක්වා රක්ෂිත බණ්ධනාගාරගත කිරීමට නියෝග කර තිබුණා.
එම දිනයේ දී සැකකරුවන් හඳුනාගැනීමේ පෙරට්ටුවකට ද ඉදිරිපත් කිරීමට නියමිතයි.
පාර්ලිමේන්තු මන්ත්‍රී විජේසිරි බස්නායක මහතා කුලියාපිටිය කොට්ඨාස අපරාධ විමර්ශන කාර්යාංශයට කළ පැමිණිල්ලකට අනුව සැකකරුවන් අත්අඩංගුවට ගෙන තිබෙනවා.
මෙම සිද්ධිය ඇතිවී තිබුණේ, ඊයේ පස්වරුවේ කුරුණෑගල බිංගිරිය ප්‍රදේශයේ පිහිටි ඇගලුම් කම්හල් පරිශ්‍රයක දීයි.
කර්මාන්ත ශාලාවේ සේවකයින්ගේ ප්‍රවාහන පහසුකම් සම්බන්ධයෙන් වූ ගැටලුවක් පිළිබඳ සාකච්ඡා කිරීමට ජාතික ජන බලවේගයේ පුත්තලම දිස්ත්‍රික් පාර්ලිමේන්තු මන්ත්‍රී අජිත් ගිහාන් ප්‍රනාන්දු සහ එහි කුරුණෑගල දිස්ත්‍රික් පාර්ලිමේන්තු මන්ත්‍රී විජේසිරි බස්නායක යන ඊයේ පස්වරුවේ එහි ගොස් තිබුණා.
කෙසේ වෙතත් පැයක පමණ කාලයක් ආයතනය තුළ පැවති සාකච්ඡාවකින් පසු පිටතට පැමිණි මන්ත්‍රීවරුන්ට කම්හල් සේවකයින්ට ප්‍රවාහන පහසුකම් සපයන පිරිසකගෙන් දැඩි විරෝධයක් එල්ල වුණා.
