නිර්ධන පන්තියේ යැයි පවසන ජනපති තෙල් මිල සංශෝධනයේ දී ධනපති පන්තියට සහන දී තිබෙන බව සමගි ජන බලවේගයේ නායක සජිත් ප්‍රේමදාස මහතා පවසනවා.
මට්ටක්කුලියේදී පැවති ජනහමුවකදී ඔහු මේ බව සඳහන් කර සිටියා.
වත්මන් ජනාධිපතිවරයා විසින් ජනාධිපතිවරණයේ දි අපේක්ෂකයකු ලෙස වේදිකාවක් වේදිකාවක් පාසා රටේ ජනතාවට විශාල බලාපොරොත්තු දුන් බවත් ක්‍රමයේ වෙනසක් කරන බව පැවසුවද අද වන විට ක්‍රමයේ වෙනසක්ද සිදුව නොමැති බව සජිත් ප්‍රේමදාස මහතා පවසා සිටියා.
රටේ ක්‍රමවේදයේ වෙනසක් වෙනුවට ඔහුගේ පක්ෂය, ලාංඡනය, කණ්ඩායම සහ සමාජ මාධ්‍ය කණ්ඩායමේ වෙනසක් සිදුව තිබෙන බව ඔහු සිය අදහස් දක්වමින් පැවසුවා.
තවද ප්‍රේමදාස මහතා සඳහන් කළේ බලයට පැමිණි පසු විදුලි බිල , තෙල් මිල, අත්‍යාවශ්‍ය ආහාරවල මිල අඩු කිරීම, පාස්පෝට් පෝලිම් නැති කිරීම හා බදු අඩු කරනවා යැයි පැවසුවද මේ කිසිවක් සිදු නොවු බවයි.
බඩු මිල හෝ හාල් පොල් මිලවත් අඩු කරන්න ඔහුට නොහැකි වූ බවත් මේ වන විට පොල් පෝලිම් නිර්මාණය වී ඇති බව පෙන්වා දුන් ප්‍රේමදාස මහතා විපක්ෂයේ සිටියදී ඉන්ධන මිල සූත්‍රයට බැන බැන සිට අද එම මිල සූත්‍රයම උපයෝගී කර ගනිමින් ධනපතියන් භාවිත කරන සුපිරි තෙල්වල මිල පමණක් අඩු කර ඇති බවත් සාමාන්‍ය ජනතාව භාවිත කරන තෙල්වල මිල අඩු නොකර ඇති බවත් අවධාරණය කළා.
මාධ්‍යයටද බලපෑම් කරන ජනාධිපතිවරයා ඒකාධිපති රංගනයක නිරත වන බවත් ඒකාධිපති නොවී ජනතාව වෙනුවෙන් දුන් පොරොන්දු ඉටු කරන ලෙස ඉල්ලා සිටින බවත් සජිත් ප්‍රේමදාස මහතා වැඩිදුරටත් පවසා සිටියා.
