2019දී ශූරත්වය වීරත්වය ගැන සිතා ඇතැමුන් වැරදි මාවත තෝරාගත් බවත්, එයින් වසර දෙකකට පසු සිද්ධ වුණේ මන්දපෝෂණයෙන් පිරුණු රටක් බිහි වීම බවත් විපක්ෂ නායක සජිත් ප්‍රේමදාස පවසනවා.
ගර්භණී මව්වරුන්ට පෝෂණ සලාකයවත් ලබා දෙන්නට නොහැකි තත්වයට බංකොළොත් වී ඇති රටක ඇමති තනතුරු ලබා ගැනීමට හිත හදා ගැනීමට හැක්කේ කාටදැයි විපක්ෂ නායකවරයා එහිදී විමසා සිටියා.
ගැබිණි මව්වරුන් වෙත වියළි සලාක ප්‍රදානය කිරීමේ වැඩසටහනක් සමගි ජන බලවේගයේ පාර්ලිමේන්තු මන්ත්‍රී හේෂා විතානගේ විසින් සංවිධානය කරනු ලැබීය. එය, කොලොන්න තුංකම තෙරුන්නාන්සේගම විහාරස්ථානයේදී ඊයේ (14) පැවැත්විණි.
සෞඛ්‍ය සම්පන්න දරු පිරිසක් සහ මව්වරුන් පිරිසක් බිහි කිරීම පවා සුරක්ෂිත ජාතික ආරක්ෂාව වෙනුවෙන් වැදගත් වන බව එහිදී අවධාරණය කරනු ලැබීය.
මේ මොහොතේ කළ යුත්තේ ඇමති තනතුරු ඇතුලු තාන්න මාන්න වෙනුවට රට වැටී ඇති ප්‍රපාතයෙන් ගොඩගැනීම උදෙසා අවංකව කැප වීම බව පැවසූ විපක්ෂ නායක සජිත් ප්‍රේමදාස අවස්ථාවාදී තනතුරු වලින් එය කළ නොහැකි බවත් අවධාරණය කර සිටියා.
