මෙරට දැනට ක්‍රියාත්මක නිරෝධායන ඇඳිරි නීතියේ ප්‍රතිඵල දැක ගැනීමටනම් අවම වශයෙන් තවත් සති දෙකකින්වත් එය දීර්ඝ කළ යුතු බව සෞඛ්‍ය සේවා අධ්යක්ෂ ජනරාල් වෛද්‍ය අසේල ගුණවර්ධන මහතා පවසනවා.
ජනතාව නිරෝධායන ඇඳිරි නීතියට අනුගත වෙමින් නිසි සෞඛ්‍ය පුරුදු පිළිපදින්නේ නම් වාර්තාවන රෝගීන් සංඛ්‍යාව අඩු වනු ඇති අතර රට නැවත විවෘත කිරීමට හැකි වනු ඇති බවයි ඔහු පවසන්නේ.
එමෙන්ම, ඔක්තෝබර් මස මැද භාගයේදී මෙරට එන්නත්කරණය අවසන් වුවහොත් ඒ මස අග භාගයේදී රට යථා තත්ත්වයට පත් වනු ඇතැයි ද ඔහු පෙන්වා දෙනවා.
තවද, ඩෙල්ටා ප්‍රභේදය රට තුළ ව්‍යාප්ත වීම හේතුවෙන් රෝගීන් සංඛ්‍යාව ඉහළ ගොස් ඇති බවත් කෙසේ වෙතත්, මෙරට ජනතාවට තෙවන බූස්ටර් මාත්‍රාවක් ලබා දීම පිළිබඳව අවසන් තීරණය ගෙන නොමැති බවත් ඔහු පවසනවා.
මේ අතර, මෙරට තුල ශීඝ්‍රයෙන් ව්‍යාප්තවෙමින් ඇති කොවිඩ් වසංගතය පාලනය කිරීම උදෙසා තවත් සති දෙකෛන් පමණ ඇඳිරි නීතිය දීර්ඝ කළ යුතු බව ප්‍රාථමික සෞඛ්‍ය සේවා, වසංගත රෝග හා කොවිඩ් රෝග පාලන කටයුතු රාජ්‍ය ඇමතිනි, විශේෂඥ වෛද්‍ය සුදර්ශනී ප්‍රනාන්දුපුල්ලේ මහත්මිය ද පවසා සිටියා.
ඩෙල්ටා ප්‍රභේදයේ ව්‍යාප්තියත් සමඟ රට තුල හඳුනානොගත් කොවිඩ් ආසාදිතයින් 50,000ක් පමණ සමාජයේ සිටිය හැකි බවයි ශ්‍රී ජයවර්ධනපුර විශ්ව විද්‍යාලයේ ප්‍රතිශක්ති විද්‍යාව හා අණුක වෛද්‍ය විද්‍යාව අංශ ප්‍රධානී සහ ඩෙංගු පර්යේෂණ අංශයේ අධ්යක්ෂ ක්‍ෂුද්‍ර ජීව විද්‍යාව පිළිබඳ මහාචාර්ය නීලිකා මලවිගේ මහත්මිය උපුටා දක්වමින් මින් පෙර අවස්තාවකදී රාජ්‍ය ඇමතිවරිය පවසා සිටියේ.
