රට බංකොලොත් වන තත්වයට පත්ව ඇති බවට විවිධ පාර්ශ්ව චෝදනා කළද එවැනි කිසිදු අවදානමක් නොමැති බව මහ බැංකු අධිපති අජිත් නිවාඩ් කබ්රාල් මහතා පවසනවා.
2020 වසරේදීද මෙවැනි අවදානමක් පිළිබඳව අනතුරු අඟවා තිබූ නමුත් මේ දක්වා එවැනි තත්වයක් ඇති නොවූ බවයි කබ්රාල් මහතා සිහිපත් කර සිටින්නේ.
ඒ, අද (12) රජයේ ප්‍රවෘත්ති දෙපාර්තමේන්තුවේ පැවති ‘2022 ශ්‍රී ලංකා ආර්ථිකය: අභියෝග හා විසඳුම්’ පිළිබඳව මාධ්‍ය දැනුවත් කිරීමේ අවස්ථාවට එක්වෙමින්.
ඉතිහාසය පුරා විටින් විට රට බංකොලොත් වන බව විවිධ කණ්ඩායම් ප්‍රකාශ කළ නමුත් ඒ කිසිදු අවස්ථාවකදී රට බංකොලොත් නොවූ බව පෙන්වා දෙන මහ බැංකු අධිපතිවරයා පවසන්නේ දැන් රට නැවතත් ක්‍රමයෙන් ස්ථාවර වෙමින් පවතින බවයි.
විදෙස් ණය ගෙවීමද ස්ථාවර වී ඇති බවත් ණය ගෙවා දැමීමේ කිසිදු අපහසුතාවයක් නොමැති බවත් කබ්රාල් මහතා පවසනවා. 2021 වසර ආරම්භය වනවිට අප සතුව පැවති සංචිත ප්‍රමාණය ඇමරිකානු ඩොලර් බිලියන 05 පමණක් වූ නමුත් වසර අවසන් වනවිට බිලියන 06 ක ණය වාරික පියවීමට සමත් වූ බවත් ඔහු සඳහන් කරනවා.
