2024 ජනාධිපතිවරණයේ අපේක්ෂකයා පිළිබඳව අවසන් තීරණය එළඹෙන සඳුදා (29) ගන්නා බව ශ්රී ලංකා පොදුජන පෙරමුණේ පක්ෂ ආරංචි මාර්ග පවසනවා.
ශ්රී ලංකා පොදුජන පෙරමුණේ ප්රධාන ලේකම් සාගර කාරියවසම් මහතා පවසා ඇත්තේ ශ්රී ලංකා පොදුජන පෙරමුණෙහි 2024 ජනාධිපති අපේක්ෂකත්වය පිළිබඳව දේශපාලන මණ්ඩල රැස්වීමේදී තීරණයක් ගනු ඇති බවයි.
එම දේශපාලන මණ්ඩල රැස්වීම ලබන සඳුදා (29) දිනයේ දී පැවැත්වෙන බව සඳහන්.
මේ වන විට ජනාධිපතිවරණයට ඉදිරිපත්වීමට නියමිත අපේක්ෂකයන් සංඛ්යාව 12 ක් දක්වා ඉහළ ගොස් තිබෙනවා.
ජනාධිපති රනිල් වික්රමසිංහ, විපක්ෂ නායක සහ සමග ජන බලවේගයේ නායක සජිත් ප්රේමදාස, ජාතික ජන බලවේගයේ නායක අනුර කුමාර දිසානායක, ශ්රී ලංකා නිදහස් පක්ෂය වෙනුවෙන් අමාත්ය ආචාර්ය විජයදාස රාජපක්ෂ, ෆීල්ඩ් මාර්ෂල් සරත් ෆොන්සේකා, මව්බිම ජනතා පක්ෂයේ නායක ව්යවසායක දිලිත් ජයවීර, ව්යවසායක ධම්මික පෙරේරා, මහජන උපයෝගීතා කොමිෂන් සභාවේ හිටපු සභාපති ජනක රත්නායක, හිටපු අමාත්ය රොෂාන් රණසිංහයන මහත්වරු සහ මිහින්තලේ රජමහා විහාරාධිපති වලවාහැංගුණවැවේ ධම්මරතන හිමියන් ඉදිරි ජනාධිපතිවරණයට ඉදිරිපත් වීමට නියමිතයි.
මීට අමතරව උතුරේ දෙමළ පක්ෂ වලින් පොදු අපේක්ෂකයකු ද පෙරටුගාමී පක්ෂය ප්රමුඛ ජන අරගලය ව්යාපාරයෙන් අපේක්ෂකයකු ද ඉදිරිපත් කිරීමට තීරණය කර ඇති බව වාර්තා වෙනවා.
මේ අතර ජනාධිපති රනිල් වික්රමසිංහ මහතා 2024 ජනාධිපතිවරණය සඳහා ස්වාධීන අපේක්ෂකයෙකු ලෙස ඉදිරිපත්වීමට ඇප තැන්පත් කර තිබෙනවා.
ඔහු වෙනුවෙන් ජනාධිපති නීතිඥ රොනල්ඩ් සී. පෙරේරා මහතා අද (26) පෙරවරුවේ ඇප මුදල් තැන්පත් කර තිබුණා.
හිටපු පාර්ලිමේන්තු මන්ත්රී සරත් කීර්තිරත්න මහතා 2024 ජනාධිපතිවරණය සඳහා ඉදිරිපත් වෙන ස්වාධීන අපේක්ෂකයෙකු ලෙස මේ වනවිට ඇප මුදල් තැන්පත් කර ඇති බව වාර්තා වෙනවා.