කොම්පඤ්ඤ වීදිය ප්‍රදේශයේ පිහිටි රාත්‍රි සමාජ ශාලාවක ඇතිවූ සිද්ධිය රටම දැනගත්තේ යෝෂිත රාජපක්ෂ යන නම එම සිද්ධියට අදාළ වූ නිසා බව ශ්‍රී ලංකා පොදු ජන පෙරමුණේ හිටපු මන්ත්‍රී තිස්ස කුට්ටිආරච්චි මහතා පවසනවා.
මාධ්‍යට අදහස් දක්වමින් ඔහු කියා සිටියේ, කෙසේ නමුත් රාත්‍රී සමාජ ශාලාවල එවැනි ගැටුම් නිතර ඇතිවන බවත් යෝෂිත රාජපක්ෂ එම සිද්ධිය වූ ස්ථානයේ සිටි බවට තමා දුටුවේ නැති බවයි.
එමෙන්ම යෝෂිත රාජපක්ෂ කිසිදා දේශපානලයට සම්බන්ධ නොවූ කෙනෙකු බැවින් මෙම ගැටුම්කාරි සිද්ධිය පාර්ලිමේන්තු මන්ත්‍රී නාමල් රාජපක්ෂ මහතාට අදාළ කාරණාවක් නොවන බවයි තිස්ස කුට්ටිආරච්චි පවසන්නේ.
එහිදී වැඩිදුරටත් අදහස් දැක්වූ තිස්ස කුට්ටිආරච්චි මහතා :
“මං හිතන්නේ ක්ලබ් එකක ගිහිල්ලා පොඩි සිද්ධියක් ඇතිවුණාම, ඒක යෝෂිත රාජපක්ෂ කියන නම එතන ගෑවුන නිසා තමයි රටම ලෝකය දැනගත්ත සිද්ධියක් බවට පත්වෙන්නේ. ක්ලබ්වල සමහර වෙලාවලට ගහගන්නවා ක්ලබ්වල ප්‍රශ්න ඇති වෙනවා, වචන හුවමාරු වෙනවා මිත්‍රයෝ මිත්‍රයෝ ගහගන්නවා,මිත්‍රයෝ අතර ප්‍රශ්න සිදුවෙනවා. ඕක ක්ලබ් වල විතරක් නෙමෙයි,sport meet වලත් සිදුවෙනවා.හන්දියක් ගානෙත් සිද්ධ වෙනවා. එහෙමයි කියලා යෝෂිත රාජපක්ෂ මහතා එතන ඉන්නවනම් මම දැක්කේ නැහැ. ඔහු එතැනට ගිහිල්ලා එතන ඉන්න අයත් එක්ක ගහගෙන එතන විශාල ප්‍රශ්නයක් වුණා නම් ඒක නීති ගැටලුවක් නම් ඒ සම්බන්ධව නීතිමය ක්‍රියාමාර්ග ගන්න කියලා තමයි අපි රජයට සහ අදාළ නිලධාරීවරුන්ට මතක් කරන්නේ. ඒවගේම තමයි මේකෙ දේශපාලන කාරණාව කිසිම දවසක යෝෂිත රාජපක්ෂ දේශපාලනයට ආපු පුද්ගලයෙක් නෙවෙයි. නාමල් රාජපක්ෂ තමයි මේ වන විට දේශපාලනයේ ඉන්නේ රාජපක්ෂ පරපුරේ. එනිසා මං හිතන්නෙ නෑ නාමල් රාජපක්ෂගේ දේශපාලනයට ඒක අදාළ කාරණයක් වෙයි කියලා”
