නවක තරුණ ගායන ශිල්පිණියක් වන යොහානි විසින් ශ්‍රී ලාංකීය සංගීත ක්ෂේත්‍රයේ නව වාර්තාවක් සනිටුහන් කරමින් යූටියුබ් රසිකයන් මිලියනයක් රැස් කර ගැනීමට සමත්ව තිබෙනවා.
මීට මාස 2කට පමණ පෙර ඇයගේ youtube channel එක සතුව 300,000ක පමණ subscribers ප්‍රමාණයක් පැවති අතර මේ වන විට එම ගණන මිලියන 1.01ද පසුකර ගොස් හමාරයි.
ඇයගේ මෙම ගමණයට විශාල රුකුලක් ලැබුනේ ජාත්‍යන්තරය ආදරයෙන් වැළඳගත් “මැණිකේ මගේ හිතේ” ගීතයයි.
ජනප්‍රිය නවක ගායන ශිල්පී සතීෂාන් 2020 වසරේ එළිදැක්වූ ගීතයක් වන ‘මැණිකේ මගේ හිතේ’ ගීතයට නව ආරක් එක් කරමින් යොහානි සමඟ නැවත වීඩියෝවක් එළිදැක්වූයේ මීට මාස 2කට උඩදීයි.
ඉතාම කෙටි කලකින් යූ ටියුබ් වෙබ් අඩවියේ නැරඹුම් වාර මිලියන 36ක් පසු කිරීමට එම ගීතයට හැකිවූයේ දෙස් විදෙස් රසික ප්‍රතිචාර රැසක් ලබාගනිමින්.
මේ අතර ප්‍රවීණ බොලිවුඩ් රංගන ශිල්පී අමිතාබ් භච්චන් ද එම ගීතය පිළිබඳව සිය ට්විටර් ගිණුමේ සටහනක් තැබීමත් සමඟ එම අවධානය තවත් තීව්‍ර වූ අතර ඉන්දීය මාධ්‍ය විසින්ද ඒ සම්බන්ධයෙන් වාර්තා කළා.
