පසුගියදා බන්ධනාගාර දෙකක් සම්බන්ධව ඇතිවූ සිද්ධීන් සම්බන්ධයෙන් පැමිණිල්ලක් ගොනු වුවහොත් හිටපු බන්ධනාගාර කළමනාකරණ සහ සිරකරුවන්ගේ පුනරුත්ථාපන රාජ්‍ය අමාත්‍ය ලොහාන් රත්වත්තේ මහතාට එරෙහිව පියවර ගැනීමට සූදානම් බව මහජන ආරක්ෂක අමාත්‍ය සරත් වීරසේකර මහතා පවසන බව ‘ද මෝනිං’ පුවත්පත වාර්තා කරනවා.
මෙම සිදුවීම් දෙකට අදාළව වරද භාරගනිමින් ලොහාන් රත්වත්තේ මහතා ඊයේ සිය බන්ධනාගාර කළමනාකරණ සහ සිරකරුවන්ගේ පුනරුත්ථාපන රාජ්‍ය අමාත්‍ය ධූරයෙන් පමණක් ඉල්ලා අස්වුණා.
ඔහු බීමතින් සිටියදී මිතුරන් කණ්ඩායමක් සමඟ වැලිකඩ බන්ධනාගාරයට ඇතුළු වූ බව වාර්තා වන අතර අනුරාධපුර බන්ධනාගාරයේ සිරකරුවන් දෙදෙනෙකුට හිසට තුවක්කුව එල්ල කර තර්ජනය කළ බවටද චෝදනා එල්ල වුණා.
මේ සම්බන්ධයෙන් අදහස් දක්වමින් මහජන ආරක්ෂක ඇමති, රියර් අද්මිරාල් (විශ්‍රාමික) සරත් වීරසේකර මහතා පවසන්නේ මේ සම්බන්ධයෙන් කිසියම් පුද්ගලයෙකු පැමිණිල්ලක් කළහොත් පාර්ලිමේන්තු මන්ත්‍රීවරයාට එරෙහිව සිය අමාත්‍යාංශය පියවර ගැනීමට සූදානම් බවයි.
සරත් වීරසේකර මහතා පෙන්වා දෙන්නේ බන්ධනාගාර සංකීර්ණ තුළ ආයුධ භාවිතා කිරීමට එරෙහිව පියවර ගැනීමට මහජන ආරක්ෂක අමාත්‍යාංශයට හැකි වන බවයි.
“මම හිතන්නේ ඔහු පාවිච්චි කළ තුවක්කුව බලපත්‍රලාභී ගිනි අවියක්. කෙසේ වෙතත් මෙම සිද්ධීන් සම්බන්ධයෙන් යමෙකු පැමිණිලි කළහොත් නීතියට අනුව ඊට එරෙහිව පියවර ගැනීමට අපට හැකි වනු ඇත”
