ළමා මන්දපෝෂණය සම්බන්ධයෙන් සිදුකළ ප්‍රකාශයකින් අනතුරුව වැඩ තහනම් කිරීමෙන් සෞඛ්‍ය බලධාරීන් තම මුලික මිනිස් අයිතීන් උල්ලංඝණය වූ බවට පවසමින් වෛද්‍ය හා සිවිල් අයිතිවාසිකම් පිළිබඳ සමිති සම්මේලනයේ සභාපති වෛද්‍ය චමල් සංජීව මහතා ගොනු කරන ලද මුලික අයිතිවාසිකම් පෙත්සම විභාගයට ගැනීමට ශ්‍රේෂ්ඨාධිකරණය ඊයේ (14) තීරණය කළා.
පෙත්සම කැඳවූ අවස්ථාවේ ඉදිරිපත් වූ කරුණු සලකා බැලීමෙන් අනතුරුව ශ්‍රේෂ්ඨාධිකරණය පෙත්සම විභාගයට ගැනීමට අවසර ලබා දුන්නා.
ශ්‍රේෂ්ඨාධිකරණ විනිසුරුවරුන් වන බුවනෙක අලුවිහාරේ, කුමුදුනී වික්‍රමසිංහ සහ ජනක් ද සිල්වා යන මහත්ම මහත්මීන්ගෙන් සමන්විත ත්‍රිපුද්ගල විනිසුරු මඩුල්ල මෙම තීරණය ගනු ලැබුවා.
වෛද්‍ය චමල් සංජීව මහතා විසින් ගොනු කළ මෙම මුලික අයිතිවාසිකම් පෙත්සමේ වගඋත්තරකරුවන් ලෙස සෞඛ්‍ය බලධාරීන් පිරිසක් නම් කර තිබෙනවා.
