පොසොන් පොහොය දිනයේ අනුරාධපුරයේදී ජනාධිපතිවරයාගේ ප්රභූ රථ පෙළේ මෝටර් රථයක කුඩා ලොරි රථයක් ගැටීමෙන් සිදු වූ අනතුරකින් බරපතළ තුවාල ලැබූ ලොරි රථයේ රියදුරු, ඔහුගේ ගර්භණී බිරිඳ ඇතුළු තිදෙනකු අනුරාධපුර රෝහලේ ප්රතිකාර ලබමින් සිටින බවට වාර්තා වනවා.
ජනාධිපතිවරයාගේ තන්තිරිමලේ සංචාරයෙන් පසු මේ වාහන පෙළ එදින පස්වරු 6.30ට පමණ තිසා වැව අසල ප්රදේශයෙන් ගමන් කර තිබුණා.
එහිදී මෙම අනතුර සිදුවී ඇති අතර, අනතුර සිදු වූ ප්රභූ රථ පෙළේ වාහනයේ අංක තහඩු ඉවත් කිරීමට එහි සිටි පිරිස කටයුතු කර තිබෙන බවට පැවසෙනවා.
මෙම සිදුවිම ඇසින් දුටු පිරිස පවසන්නේ එම වාහනය අධික වේගයෙන් පාරේ වැරදි දෙසින් පැමිණි බවයි.
අනතුර සිදු වු වාහනය ජනාධිපති කාර්ය මණ්ඩල ප්රධානී සාගල රත්නායක මහතාගේ රථයක් බවට වාර්තා වනවා.
අනතුරට මුහුණ දුන් ලොරි රථයේ රියදුරාගේ පාදයක් අස්ථි බිදිමකට ලක්ව තිබෙන අතර ඔහුගේ හිසට ද හානි සිදු වී තිබෙනවා.
ඔහුගේ බිරිඳ වන ගර්භණී කාන්තාවගේ පාදයට ශල්යකර්මයක් සිදුකර තිබෙන බවට පැවසෙනවා.
ලොරි රථයේ පිටුපස ගමන් ගත් පස්දෙනෙකු අතරින් එක් කුඩා දරුවකුගේ පාදයට දැඩි හානි සිදුවී ඇතැයි ද වාර්තා වනවා.
ප්රභූ රථ පෙළේ වාහනයේ රියදුරා අනුරාධපුර පොලිසියෙන් අත්අඩංගුවට ගෙන මහේස්ත්රාත් හමුවට ඉදිරිපත් කිරීමෙන් පසු ඇප පිට මුදාහැර තිබෙනවා.
තවද බරපතළ තුවාල ලැබූ තිදෙනකු රෝහල්ගත කර තිබියදී රියදුරා මුදාහැර ඇති අතර, දිගින්-දිගටම අදාළ රෝගීන් රෝහලෙන් හැකි ඉක්මනින් පිටකිරීමේ උත්සාහයක් ද ක්රියාත්මක වන බවට තොරතුරු වාර්තා වනවා.