පියයුරු පිළිකා පිළිබදව දැනුවත් කිරීමේ මාසය සංකේතවත් කරමින් කොළඹ නෙලුම් කුළුන අද (22) රෝසපැහැයෙන් ආලෝකවත් කිරීමට නියමිතයි.
පියයුරු පිළිකා පිළිබඳ දැනුවත් කිරීමේ මාසය වෙනුවෙන් සෑම වසරකම ඔක්තෝම්බර් මාසයේ සිදුකෙරෙන ගෝලීය ක්‍රියාකාරකම්වලට සමගාමීම වසර 2020 දී ශ්‍රී ලංකාව නෙලුම් කුළුන රෝස පැහැයෙන් ආලෝකවත් කරමින් මෙම වැඩසටහනට එක්වී තිබෙනවා.
රටවල් 140 කට අධික සංඛ්‍යාවක සුවිශේෂී ස්ථාන රෝස පැහැයෙන් ආලෝකමත් කරමින් පියයුරු පිළිකා පිළිබදව ගෝලීය වශයෙන් දැනුවත් කිරීම ප්‍රවර්ධනය කරමින් පියයුරු පිළිකාව කලින් හදුනාගැනීමේ වැදගත්කම සැමට සිහිපත් කරයි.
ශ්‍රී ලංකාවේ සෑම වසරකම කාන්තාවන් 4000 කට ආසන්න සංඛ්‍යාවක්ද සෑම දිනෙකම කාන්තාවන් 12 කට ආසන්න සංඛ්‍යාවක්ද පියයුරු පිළිකාවට ගොදුරු වන බවයි වාර්තා වන්නේ.
කෙසේ වෙතත් දැවැන්ත ජනතා බදු මුදලක් වියදම් කරමින් සාදා නිමකරන ලද නෙළුම් කුළුණ විවිධ දිනයන් නියෝජනය කරමින් විවිධ පැහැයෙන් ආලෝකවත් කරනවා හැරෙන්නට වෙනත් කිසිඳු ඵලදායී ක්‍රියාවකට යොදා ගැනීමට මීට පෙර පැවති රජය මෙන්ම වත්මන් රජයටද නොහැකිවී තිබීමද විශේෂත්වයක්.
