නව කැලණි පාලමේ රුපියල් මිලියන ගණනක් වටිනා ඇණ ගලවා සොරකම් කර ඇති බවට කරන ප්‍රකාශ ප්‍රතික්ෂේප කරන බව ප්‍රවාහන අමාත්‍ය බන්දුල ගුණවර්ධන පවසනවා.
අද (18) දින පාර්ලිමේන්තුවේදී අදහස් දක්වමින් අමාත්‍යවරයා කියා සිටියේ ඒවා ඉවත් කිරීමට අවශ්‍ය විශේෂ මෙවලම් ඇත්තේ අදාළ ඉංජිනේරු සමාගම් සතුව පමණක් බවයි.
ඒවා ඉවත් කිරීම පහසු වුවහොත් පාලම් අනතුරේ වැටෙන බවත් ඔහු පෙන්වා දෙනවා.
දයාසිරි ජයසේකර මන්ත්‍රීවරයා ඊයේ ඉදීරිපත් කළ ප්‍රශ්නයකට පිළිතුරු දෙමින් අමාත්‍යවරයා කියා සිටියේ අපවහන පද්ධතියේ ජීඅයි පයිප්ප කිහිපයක් පීවීසී පයිප්ප, පාලමට සම්බන්ධ සන්නිවේදන කාමරයේ වායු සමීකරණ පද්ධතියේ සමහර කොටස් සහ පාලම දිගේ සවි කර ඇති වර්ණ බල්බ පමණක් සොරාගෙන ඇති බවයි.
අමාත්‍යවරයාට අනුව පාලමෙන් සොරාගත් භාණ්ඩවල මුළු වටිනාකම රු. මිලියන 5.9 කි. කොළඹ කටුනායක අධිවේගී මාර්ගයේ පිත්තල කම්බි, ජීඅයි පයිප්ප, විදුලි පහන් කණු වැනි රුපියල් මිලියන 294.4 ක් වටිනා භාණ්ඩ ද සොරාගෙන ගොස් ඇති බවත් ඔහු පෙන්වා දෙනවා.
කෙසේ නමුත්, මාර්ග සංවර්ධන අධිකාරියේ අධ්‍යක්ෂ ජනරාල් එල්.වී.එස්.වීරකෝන් විසින් පසුගිය 14 වනදා මාධ්‍ය වෙත කරුණු දක්වමින් පවසා සිටියේ කටුනායක සහ නව කැළණි පාලම 2021 ජනතා අයිතියට පත්කිරීමෙන් පසු එහි ඉලෙට්‍රික් කේබල්, පැනල් බෝඩි, ඇණ, ඩවුන් පයිප්ප සහ CCTV ගලවාගෙන ගොස් ඇති අතර ඒවායේ වටිනාකම රු. මිලියන 275 ක් පමණ වන බවයි
