කුමන ගිවිසුමකට එළඹී සිටියද වත්මන් රජය විසින් යෝජනා කරන මිල ගණන්වලට එකඟ නොවන්නේ නම් අදානි සමාගම සමඟ මන්නාරම සුළං බලාගාර ව්‍යාපෘතිය ක්‍රියාත්මක නොකරන බව ජනාධිපති අනුර කුමාර දිසානායක මහතා පවසනවා.
දෙයියන්දර ප්‍රදේශයේ ඊයේ (30) පැවති ජන රැළියකට එක්වෙමින් ජනාධිපතිවරයා මේ බව පවසා සිටියා.
අදානි ගිවිසුම නතර විම බරපතළ අපරාධයක් බවට හිටපු ජනාධිපති රනිල් වික්‍රමසිංහ මහතා සිදු කළ ප්‍රකාශයකට ප්‍රතිචාර දක්වමින් අනුර කුමාර දිසානායක මහතා සඳහන් කළේ වැඩි මුදලකට මෙම ව්‍යාපෘතිය ආරම්භ කිරීමම අපරාධයක් වනු ඇති බවයි.
“13ට හදන්න පුළුවන්කම තියෙද්දී 25ට ගන්නවා, ඉතුරු 12 ඒගොල්ලෝ ඒගොල්ලෝ අතර බෙදෙනවා, මේ විදුලි ඒකකයකට, අපි එහෙම කරන්නේ නැහැ..අපි හැම ව්‍යාපෘ තියක් ගැනම කල්පනා කරන්නෙ රට, ජනතාවගේ පැත්තෙන්.
…සුලං බලයෙන් විදුලිය හදන්නා බලාගාරෙකට දුන්නා, ඒගොල්ලො විදුලිය හදලා අපිට විකුණනවා. විදුලි බල මණ්ඩලයෙන්, අපි ගිවිසුම අත්සන් කළා ඩොලර් ශත 4.58යි, ආසන්න වශයෙන් ගත්තොත් රුපියල් 13 ශත 50ක වගේ ප්‍රමාණයක. ඒගොල්ලෝ විදුලිය හදලා අපිට යුනිට් එකක් දෙනව 13.50ට, හැබැයි හිටපු ආණ්ඩුව ඒ විදියටම සුළං බලාගරයක් දීලා තියෙනව, ඒගොල්ලෝ විදුලිය හදලා අපිට ඒකකයක් දෙන්නේ ඩොලර් ශත 8.26යි ඒකියන්නෙ රුපියල් 25යි…”
