පසුගිය නොවැම්බර් 27 වෙනිදා හෝ ඊට ආසන්න දිනයකදී ජනාධිපතිවරයා විසින් තමන්ව කැඳවා මන්නාරම සුළං විදුලි බලාගාරය ඉන්දියාවේ ප්‍රකට සමාගමක් වන ආදානි සමාගමට ලබාදෙන්නැයි පැවසූ බව ලංකා විදුලිබල මණ්ඩලයේ සභාපති එම්. එම්. සී ෆර්ඩිනැන්ඩු මහතා පවසනවා.
ලංකා විදුලිබල මණ්ඩලය ඊයේ (10) පාර්ලිමේන්තු පොදු ව්‍යාපාර පිළිබඳ කාරක සභාව හෙවත් කෝප් කමිටුව හමුවට කැඳවනු ලැබූ අවස්ථාවේදී මේ පිළිබඳව අනාවරණය වුණා.
එහිදී එම්. එම්. සී ෆර්ඩිනැන්ඩු මහතා සඳහන් කළේ ඉන්දීය ජනාධිපති නරේන්ද්‍ර මෝදි මහතා විසින් අදාළ සුළං විදුලි බලාගාරය අදානි සමාගමට ලබාදෙන ලෙස තමන්ට බලකර සිටින බවට ජනාධිපතිවරයා පැවසූ බවයි.
කෙසේවෙතත් එය ශ්‍රී ලංකා ආයෝජන මණ්ඩලයට අයත් ව්‍යාපෘතියක් බැවින් ඊට තමන්ට මැදිහත් විය නොහැකි බව දන්වමින් හා ජනාධිපතිවරයා අදාළ බලාගාරය ඉන්දීය සමාගමට ලබාදෙන්නැයි නියෝග කරන බව සඳහන් කරමින් මුදල් අමාත්‍යංශයේ ලේකම්වරයාට තමන් ලිපියක් යොමුකළ බව ලංකා විදුලිබල මණ්ඩලයේ සභාපතිවරයා කෝප් කමිටුව ඉදිරියේ අනාවරණය කළා.
මේ අතර ට්විටර් පණිවුඩයක් නිකුත් කරමින් ජනාධිපති ගෝඨාභය රාජපක්ෂ මහතා සඳහන් කරන්නේ විදුලිබල මණ්ඩලයේ සභාපතිවරයා කෝප් කමිටුව හමුවේ සිදුකළ ප්‍රකාශය තමා මුළුමනින්ම ප්‍රතික්ෂේප කරන බවයි.
මන්නාරම සුළං විදුලි බලාගාර ව්‍යාපෘතිය නිශ්චිත පුද්ගලයෙකුට හෝ ආයතනයකට පිරිනැමීමේදී අධිකාරීමය බලය භාවිත කළ බවට ලංකා විදුලිබල මණ්ඩලයේ සභාපතිවරයා කළ ප්‍රකාශය තමන් ප්‍රතික්ෂේප කරන බව අදාළ ට්විටර් පණිවුඩයේ සඳහන්.
