රජය විසින් භාණ්ඩ මිල පාලනයට මැදිහත්වීම සම්බන්ධයෙන් එක ප්‍රතිපත්තියක් රජයට නොතිබූ බව වෙළෙඳ අමාත්‍ය, ආචාර්ය බන්දුල ගුණවර්ධන මහතා පවසනවා.
ඒ, ඊයේ (04) දින පෙරවරුවේ රූපවාහිනී සංවාදාත්මක වැඩසටහනකට සහභාගී වෙමින්.
මෙට්‍රික් ටොන් ලක්ෂ 01ක සහල් ආනයනය කරන බවත් ඒ සඳහා ටෙන්ඩර් ක්‍රියාවලිය අරඹා ඇති බවත් මීට මාස 2කට පමණ ප්‍රථමව පැවසුවේ වෙළෙඳුන් බිය කිරීමටදැයි එහිදී මාධ්‍යවේදියා කළ විමසීමට පිළිතුරු දෙමින් අමාත්‍යවරයා ප්‍රකාශ කර සිටියේ තමා ඒ සඳහා කැබිනට් පත්‍රිකාව ඉදිරිපත් කළ නමුත් ජනාධිපතිවරයා ඊට ඉඩ නොදුන් බවයි.
එමෙන්ම ආනයන කරුවන්ට ආනයන බලපත්‍ර ලබාදී ඇති බැවින් හල් වෙළඳපොළෙන් ආනයනය කර විශාල ලාභ නොමැතිව රුපියල් සියයකට අඩු මුදලකට සහල් ලබා දිය හැකි බවත් පිටකොටුවේ සියයට අඩුවෙන් විහිණීමට හැකිනම් පමණක් සහල් ආනයනය කළ යුතු බවත් ඔහු පවසනවා.
යම් හෙයකින්, ඔවුන් වැඩිමිලට ආනයනය කළහොත් නැවත ආනයනය සඳහා බලපත්‍ර ලබා නොදෙන බවයි ඔහු අවධාරණය කර සිටින්නේ.
එමෙන්ම පාලන මිල ඉවත් කළ පසු සීනි මිල විශාල ලෙස ඉහළ යාමේ තත්වයක් ඇතිවුවහොත් ඒ සඳහා විකල්ප කිහිපයක් ඇති බවත් රුපියල් 122ක මිලට සුදු සීනි කිලෝ 2ක් සහ රුපියල් 125ක මිලට රතු සීනි කිලෝ තුනක් හෝ ඊට වැඩි ප්‍රමාණයක් එක පාරිභෝගිකයෙකුට ස.තො.ස. හරහා ලබා දීමට කටයුතු කරන බවද ඔහු පවසනවා.
