ගෝඨාභය රාජපක්ෂ රජයෙන්ම ත්‍රස්ත සංවිධානයක් ලෙස නම් කර තිබූ ‘කටාර් චැරිටි ‘ සංවිධානය තහනම් ලැයිස්තුවෙන් ඉවත් කිරීමට යළිත් ගෝඨාභය රාජපක්ෂ රජය තීරණය කර තිබෙනවා.
ඒ කටාරයේ සංචාරයක නිරත විදුලිබල හා බලශක්ති අමාත්‍ය කාංචන විජේසේකර මහතා කටාර් චැරිටි සංවිධානයේ නියෝජිතයන් මුණ ගැනීමෙන් අනතුරුවයි.
එහිදී අමාත්‍යවරයා ‘කටාර් චැරිටි ‘ සංවිධානයට දැනුම් දී ඇත්තේ අදාළ සංවිධානයට එරෙහිව ලංකාව පනවා ඇති තහනම ඉවත් කිරීමට ශ්‍රී ලංකා රජය තීරණය කර ඇති බවයි.
‘කටාර් චැරිටි ‘ සංවිධානය 2019 වසරේ දි ගෝඨාභය රාජපක්ෂ රජය විසින් තනහම් කරනු ලැබූවා.
එය තහනම් කරමින් එවකට මහජන ආරක්ෂක අමාත්‍ය සරත් වීරසේකර මහතා පාර්ලිමේන්තුව හමුවේ ප්‍රකාශ කර සිටියේ, කටාර් චැරිටි, ත්‍රස්ත සංවිධානයක් ලෙස නම් කරන බවයි.
කටාර් චැරිටි සංවිධානයට එරෙහිව රජය එල්ල කළ එම චෝදනාව උපයෝගී කරගනිමින් නීතීඥ හිජාස් හිස්බුල්ලා ත්‍රස්තවාදය වැළැක්වීමේ පනත යටතේ අත්අඩංගුවට ගෙන රදවා තබා ගැනීමටද ගෝඨාභය රාජපක්ෂ රජය කටයුතු කළා.
හිජාස් හිස්බුල්ලාගේ සභාපතීත්වයෙන් යුතු සේව් ද පර්ල් නම් සංවිධානයට, කටාර් චැරිටි වෙතින් රුපියල් මිලියන 13 ක් ලැබී ඇති බව එවක මහජන ආරක්ෂක අමාත්‍ය සරත් වීරසේකර පාර්ලිමේන්තුව හමුවේ ප්‍රකාශ කර සිටියා.
ඔහු සදහන් කළේ, කටාර් චැරිටි ත්‍රස්ත සංවිධානයක් බවත්, එම සංවිධානයෙන් මුදල් ලබා තිබෙන නීතීඥ හිජාස් හිස්බුල්ලා ත්‍රස්ත ක්‍රියා සම්බන්ධයෙන් සැකකරුවෙකු බවත්ය.
