වෙළඳපොළ තුළ මේ වනවිට සහල් හිඟයක් නිර්මාණය වී ඇත්තේ වී හිඟයක් නිසා නොවන බව එක්සත් සහල් නිෂ්පාදකයින්ගේ සංගමය පවසනවා.
ඒ අනුව වෙළඳපොළ තුළ සහල් හිඟවීමට හේතුවී ඇත්තේ 2022 වසරේ හිටපු ජනාධිපති ගෝඨාභය රාජපක්ෂ නිකුත් කළ ගැසට් නිවේදනයක් මත වත්මන් රජයද තවදුරටත් කටයුතු කිරීම නිසා බවයි එහි සභාපති මුදිත් පෙරේරා මහතා පවසන්නේ.
අද (20) පැවති මාධ්‍ය හමුවකට එක්වෙමින් ඔහු කියා සිටියේ, සහල් හිඟයට පිළියම වන්නේ සහල් ආනයනය කිරීම නොව වසර දෙකක් පරණ එම ගැසට් නිවේදනය යාවත්කාලීන කිරීම බවයි.
පසුගිය වසර දෙක තුළ වී කිලෝවක නිෂ්පාදන වියදම, සහල් කිලෝවක නිෂ්පාදන වියදම විශාල ප්‍රතිශතයකින් වෙනස්වී ඇති බවත් මෙම ගැසට් නිවේදනය යාවත්කාලීන කිරීම මඟින් සහල් අර්බුදය එක රැයින් අවසන් කළ හැකි බවත් එක්සත් සහල් නිෂ්පාදකයින්ගේ සංගමය වැඩිදුරටත් පෙන්වා දෙනවා.
