කල්පිටිය මහේස්ත්‍රාත් අධිකරණයේ විභාග වන නඩුවකට පෙනී සිටින ලෙසට දැනුම් දීමකට මහනුවර, මාපානවතුර ප්‍රදේශයේ නිවසකට ගිය පොලිස් සැරයන්වරයකුට එම නිවසේ සිටි පියා සහ පුතුන් දෙදෙනකු විසින් පහර දී රාජකාරියට බාධා කිරිම සම්බන්ධයෙන් (70) හැවිරිදි ප්‍රධාන සැකකරු අත්අඩංගුවට ගත් බව මහනුවර පොලිසිය පවසනවා.
මෙලෙස අත්අඩංගුවට ගෙන ඇත්තේ මුළු දිවයිනටම සාමාදාන විනිසුරුවරකු වශයෙන් කටයුතු කරන පුද්ගලයකු බවත්, ඔහුගේ පුතුන් දෙදෙනා දැනට ප්‍රදේශයෙන් පැනගොස් සැඟව සිටින බවත් පොලිසිය වැඩිදුරටත් සඳහන් කළා.
ඉහත මහනුවර මුලස්ථාන පොලිසියේ රාජකාරිකරන සැරයන්වරයා දන්වා ඇත්තේ කල්පිටිය මහේස්ත්‍රාත් අධිකරණයේ ඉහත සැකකරු සම්බන්ධයෙන් විභාග වන නඩුවක් වෙනුවෙන් 2023.08.23 දින පෙනී සිටින ලෙසයි.
සැකකරුගේ නිවසට ගොස් සිද්ධිය දැනුම් දුන් අවස්ථාවේ එම සැකකරු නඩුවට විරෝධය දක්වමින් පොලිස් සැරයන්වරයාට පරුෂ වචනයෙන් බැන පහර දී ඇති බවයි පොලිසිය පැවසුවේ.
