පාස්කු ප්‍රහාරයේ මහ මොළකරුවන් සම්බන්දයෙන් කිසිදු ක්‍රියාමාර්ගයක් නොගෙන හිටපු ජනාධිපතිවරයා හා ඉහළ පොලිස් නිලධාරීන් මෙහි වගඋත්තරකරුවන් බවට පතිකිරීම අනුමත කළ නොහැකි බව අස්ගිරි පාර්ශවයේ නියෝජ්‍ය ලේඛකාධිකාරී අස්ගිරි පරිවේණාධිපති ජූජ්‍ය නාරංපනාවේ ආනන්ද නාහිමියන් පවසනවා.
පාස්කු ප්‍රහාරය පිළිබඳ ජනාධිපති කොමිෂන් වාර්තාව අසම්පූර්ණ එකක් බවත් එවැනි අසම්පූර්ණ වාර්තාවක කරුණු පදනම් කරගනිමින් නීතිය ක්‍රියාත්මක කිරීමටයෑම සාධාරණ නොවන බවත් ඊයේ (05) පැවති ප්‍රවෘත්ති සාකච්ඡාවක් අමතමින් උන්වහන්සේ සඳහන් කළා.
වරදට අනුබල දුන් අය හෝ වගකීම් පැහැරහැරි ඇයට දඩුවම් ලබාදීම වරදක් නොවන බවත් ඊට පෙර ප්‍රහාරය දියත් කළ අය සමඟ සෘජු සම්බන්දතා දැක්වූ අය සම්බන්දයෙන් නීතිය ක්‍රියාත්මක කළ යුතු බවත් නාහිමියන් පෙන්වා දෙනවා.
පාස්කු ප්‍රාහාරය සම්බන්දයෙන් හිටපු රාජ්‍ය නායකයාට හා ඉහළ පොලිස් නිලධාරීන්ට එරෙහිව නීතිය ක්‍රියාත්මක කළ යුතු බවට ආන්දෝලනාත්මක ප්‍රකාශ අසන්නට ලැබෙන බවත් ඔවුන්ට එරෙහිව නීතිය ක්‍රියාත්මකවීමට පෙර දැනට නිදැල්ලේ සිටින ප්‍රහාරයේ මහමොළකරුවන් හට නීතිය ක්‍රියාත්මක විය යුතු බවත් උන්වහන්සේ පවසනවා.
අන්තවාදයට උඩගෙඩි දෙන අය පසුගිය ආණ්ඩුවේ මෙන්ම වත්මන් ආණ්ඩුවේද සිටින බවත් වාර්ගික පදනමින් මරණ පරීක්ෂකවරුන් පත්කිරීමට අධිකරණ අමාත්‍යවරයා ගන්නා උත්සහය මඟින් මෙරට තුළ ජාතිවාදයක් ඉස්මතුවන බවත් උන්වහන්සේ ප්‍රකාශ කළා.
ශ්‍රී මහා බෝධියට, දළදා මැදුරට ප්‍රහාර එල්ලවෙද්දී අරන්තලාව භික්ෂු ඝාතනය සිදුවෙද්දී එවකට හිටපු රාජ්‍ය නායකයාට චෝදනා එල්ල නොකර ඊට වගකිවයුතු කොටි සංවිධානය පරාජය කළ බවත් මේ මොහොතේද අන්තවාදය පරාජය කළ හැක්කේ ඊට වගකිවයුතු පිරිසට දඩුවම් දීමෙන් බවත් නාරම්පනාවේ ආනන්ද නාහිමියන් වැඩිදුරටත් පෙන්වා දුන්නා.
