රට ගොඩනෑගීමට උදා වී ඇති අවසන් අවස්ථාව මෙය බව ශ්‍රී ලංකා නිදහස් පක්ෂයේ ජාතික සංවිධායක දුමින්ද දිසානායක මහතා පවසනවා.
ඒ ඊයේ (21) පෙරවරුවේ අනුරාධපුරයේ දී අදහස් දක්වමින්.
අනුරාධපුර දිස්ත්‍රික්කයේ සංවර්ධන කටයුතු සොයා බැලීම සහ ඉදිරි සැලසුම් පිළිබඳ සාකච්ඡා කිරීම වෙනුවෙන් සංවිධාන කළ අනුරාධපුර සංවර්ධන සභාව ඊයේ පෙරවරුවේ පැවැත්වුණේ ජනාධිපති රනිල් වික්‍රමසිංහගේ ප්‍රධානත්වයෙන්.
එම අවස්ථාවට ශ්‍රී ලංකා පොදුජන පෙරමුණ, ශ්‍රී ලංකා නිදහස් පක්ෂය සහ එක්සත් ජාතික පක්ෂය යන පක්ෂ තුනේම මහජන නියෝජිතයින් එක්ව සිටීම විශේෂත්වයක්.
එහිදී වැඩිදුරටත් අදහස් දක්වමින් දුමින්ද දිසානායක පවසා සිටියේ රනිල් වික්‍රමසිංහ හට ජනාධිපති ධුරය හිමිවූයේ අරගලය නිසා බැවින් අරගලකරුවන්ට තමන් ස්තූතිවන්ත වන බවයි.
රට ගොඩ නැගීම සඳහා සියලුම දේශපාලන පාර්ශවයන් එක් විය යුතු බවයි ඔහු අවධාරණය කරන්නේ.
