සුරේන්ද්‍ර වසන්ත පෙරේරා නොහොත් ක්ලබ් වසන්තගේ දේහය මේවන විට තැන්පත් කර ඇති කොළඹ, බොරැල්ලේ මල්ශාලාවට තමන් කංජිපානි ඉම්රාන් බව අඟවමින් පෙරේදා (10) රාත්‍රි 11.30ට පුද්ගලයෙකු දුරකතන ඇමතුමක් ලබාදී තිබෙන බවට වාර්තා වනවා.
ක්ලබ් වසන්තගේ දේහය අවසන් ගෞරව දැක්වීම සඳහා එහි තැන්පත් නොකරන ලෙස එම තැනැත්තා තර්ජනය කර ඇතිබව පොලීසිය පවසනවා.
එලෙස මෘත ශරීරය තැන්පත් කළහොත් මෘත ශරීරයට මෙන්ම මල්ශාලාවට ද වෙඩි තබන බවට අදාළ පුද්ගලයා විසින් තර්ජනය කර ඇති බව පොලීසිය සඳහන් කළා.
ඒ් අනුව මල්ශාලාවේ කළමනාකරු ඊයේ (11) පෙරවරුවේ මේ පිළිබඳව බොරැල්ල පොලීසියට පැමිණිල්ලක් සිදු කර තිබෙනවා.
බොරැල්ල පොලීසියේ අපරාධ විමර්ශන අංශය මගින් සිද්ධිය සම්බන්ධයෙන් විමර්ශන ආරම්භ කර ඇති අතර එහිදී අනාවරණ වී ඇත්තේ, විදෙස් රටකින් අදාළ දුරකතන ඇමතුම ලැබී ඇති බවයි.
ඒ අනුව මල්ශාලාවේ ආරක්ෂාවට පොලීසිය යොදවා තිබෙනවා.
ක්ලබ් වසන්තගේ දේහය පිළිබඳව අවසන් කටයුතු හෙට(13) බොරැල්ල පොදු සුසාන භූමියේදී සිදුකිරීමට නියමිතයි.
