ස්විස්ටර්ලන්තයේ ජිනීවාහි පිහිටි එක්සත් ජාතීන්ගේ මානව හිමිකම් කවුන්සල කාර්යාලය ඉදිරිපිටදී චීනයට එරෙහිව විරෝධතා ව්‍යාපාරයක් පවත්වා තිබේ.
විදෙස් වාර්තා සදහන් කළේ, ස්විස්ටර්ලන්තයේ සහ ලීච්ටන්ස්ටයින් රාජ්‍යයේ වෙසෙන ටිබෙට් ජාතිකයන් විශාල පිරිසක් මෙම විරෝධතාවය සදහා එක්ව සිටි බවයි.
චීනය විසින් දශක ගණනාවක් තිස්සේ ටිබෙටය තුළ ක්‍රමානුකූලව සිදුකරන මානව හිමිකම් උල්ලංඝනය කිරීම් වළක්වාලීමට මැදිහත්වන ලෙස විරෝධතාකරුවෝ මෙහිදී එක්සත් ජාතීන්ගේ මහ කොමසාරිස් කාර්යාලයෙන් සහ මානව හිමිකම් කවුන්සිලයෙන් ඉල්ලා සිටියහ.
චීනය විසින් ටිබෙට් ජනතාව භේදභින්න කර ඔවුන්ගේ මානව හිමිකම් උල්ලංඝනය කරන බවට ද විරෝධතාකරැවෝ මෙහිදී චෝදනා නැගූහ.
නවතම අන්තර්ජාතික වාර්තාවලට අනුව ටිබෙටය සැළකෙන්නේ ලොව දැඩි ලෙස නිදහස සීමා කෙරුණු කලාපයක් ලෙසයි.
