මැතිවරණ මහලේකම් කාර්යාලයේ සේවය කළ ජ්‍යෙෂ්ඨ මාණ්ඩලික නිලධාරීන් පිරිසක් ඉවත් කිරීමට හෝ ස්ථාන මාරු කිරීමට කටයුතු කරමින් සිටින බවට News19 වෙත තොරතුරු වාර්තා වනවා.
කොමිසමේ ආරංචි මාර්ග පවසන්නේ මැතිවරණ දෙපාර්තමේන්තුව ලෙස පැවැති කාලයේ හෝ මැතිවරණ කොමිසම පිහිටුවීමෙන් පසු වැඩිම මාණ්ඩලික නිලධාරීන් පිරිසක් මෙසේ වෙනස් කෙරෙන්නේ මෙවර බවයි.
මේ වන විට ස්ථාන මාරුවීම් ලබා ඇති නිලධාරීන් වන්නේ ටී. හෙන්ස්මන්, සුරංග රණසිංහ, නාලක රත්නායක, ධරණි වීරසේකර, රාජේන්ද්‍ර සසීලන්, තිලින වික්‍රමරත්න, දිලිප් ගම්ලත්, නාමල් තලංගම, ගයාන් පතිරණ, පරිපාලන නිලධාරී ජේ. යු ප්‍රියනාත්, ගණකාධිකාරි තිලක් කුමාර යන අයයි.
තවත් ජ්‍යෙෂ්ඨයන් තිදෙනෙකු සම්බන්ධයෙන් ඉදිරි සති දෙක තුළ තීරණයක් ගැනීමට නියමිත බව ද වාර්තාවනවා.
විශ්වාස කටයුතු ආරංචි මාර්ග සඳහන් කරන්නේ එක් ජ්‍යෙෂ්ඨ නිලධාරියෙකුගේ මැදිහත්වීමෙන් මේ කටයුතු සිදු වන බවයි.
එසේම ඉදිරියේදී සහකාර මැතිවරණ කොමසාරිස්වරුන් පත්නොකොට, ඒ වෙනුවට වෙනත් පත්කිරීම් සිදුකිරීම සම්බන්ධයෙන්ද මේ වන විට අභ්‍යන්තරයේ කතාබහක් පවතින බවද වාර්තා වනවා.
මේ සම්බන්ධයෙන් අදහස් දක්වන මැතිවරණ නිරීක්ෂකයන්ගේ අදහස වන්නේ අත්දැකීම් සහිත මාණ්ඩලික නිලධාරීන් මෙසේ හදිසියේ වෙනස් කිරීම ඉදිරි මැතිවරණවලට බරපතළ තර්ජනයක් වනු ඇති බවයි.
කොමිසමේ අභ්‍යන්තර ආරංචි මාර්ග සඳහන් කරන්නේ මේ ස්ථාන මාරුවීම් සහ ඉවත් කිරීම්වලින් පසු වසර 5කට වැඩි කාලයක් කොමිසමේ හෝ දෙපාර්තමේන්තුවේ සේවා අත්දැකීම් සහිත පිරිස ලෙස ඉතිරි වන්නේ ඉතා සුළු පිරිසක් බවයි.
