මාතර – වැලිගම මූලස්ථාන පොලිස් පරීක්ෂකවරයාට වහාම ක්‍රියාත්මක වන පරිදි ස්ථාන මාරුවක් ලබාදී තිබෙනවා.
ඒ පසුගිය 01 වනදා මාතර – වැලිගම – ගල්බොක්ක එන්නත් මධ්‍යස්ථානයේ පැවති එන්නත්කරණ වැඩසටහනට පැමිණ සිටි පිරිසක් විසුරුවා හැරීමේදී ඔවුන්ට බැටන් ප්‍රහාර එල්ල කරමින් හිරහැර කිරීමේ චෝදනාව මතයි.
එදින අදාළ එන්නත් මධ්‍යස්ථානයේ එන්නත් මාත්‍රා ප්‍රමාණය අවසන්වී තිබීම හේතුවෙන් එතෙක් පෝලිම්වල රැදී සිටි පිරිස් හා එන්නත් මධ්‍යස්ථානයේ සෞඛ්‍ය බලධාරීන් අතර බහින්බස්වීමක් ඇතිවුණා.
එම පිරිස විසුරුවා හැරීමට පොලීසිය කටයුතු කරන අවස්ථාවේදී එම ප්‍රදේශවාසීන්ට හිරිහැර කරන ආකාරය ප්‍රදේශවාසීන් වීඩියෝ ගතකර තිබුණා.
ඒ අනුව මහජන ආරක්ෂාව පිළිබද අමාත්‍යාංශ ලේකම්වරයාගේ අනුමැතියට යටත්ව වැලිගම මූලස්ථාන පොලිස් පරීක්ෂකවරයා ගාල්ල නියෝජ්‍ය පොලිස්පති කාර්යාලයට අනුයුක්ත කර තිබෙනවා.
