කොළඹ කොටුවේ සිට අවිස්සාවේල්ල දක්වා සවස් කාලයේ ධාවනය වන කාර්යාල දුම්රියන් ඊයේ (02) ධාවනය නොවීම සම්බන්ධයෙන් ලොකොමොටිව් ඔපරේටිං ඉංජිනේරු සංගමය ජනාධිපති රනිල් වික්‍රමසිංහ මහතා වෙත ලිපියක් යොමු කර තිබෙනවා.
දුම්රිය අංක 9262 සහ 9264 දුම්රියන් දෙකෙහි දුම්රිය රියදුරන්ට රාත්‍රියේ එකම කාමරයක විවේක ගැනීමට සිදු වීම හේතුවෙන් එය ඔවුන්ගේ පෞද්ගලිකත්වයට බාධාවක් වන බැවින් ඒ සඳහා වෙන වෙනම කාමර පසුකම් ලබා දෙන ලෙස ඔවුන් ඉල්ලීමක් කර තිබෙනවා.
එම විවේක කාමරයට මාස 6ක සිට මකුණන් බෝ වී ඇති නිසාවෙන් රියදුරන්ට රාත්‍රි කාලයේ හරිහැටි විවේකයක් ගැනීමට නොහැකි වී තිබූ බව ඔවුන් පවසනවා.
රාත්‍රී කාලයේ ප්‍රමාණවත් නින්දක් නොමැතිව දුම්රිය ධාවනය කිරීම අනතුරුදායක නිසාවෙන් ඊයේ දින සිට ඉහත සඳහන් කළ දුම්රියන් ධාවනයෙන් කොළඹ විදුලි බලවේග ධාවනාගාරයේ දුම්රිය එන්ජින් රියදුරන් ඉවත්වූ බව එම ලිපියේ සඳහන් වනවා.
මැතිවරණ කාලසීමාවක් ප්‍රකාශයට පත් කර තිබෙන මොහොතක අනීතික අන්දමින් කොළඹ විදුලි බලවේග ධාවනාගාරයේ සිට කොළඹ ජලශක්ති ධාවනාගාරය දක්වා දුම්රිය එන්ජින් රියදුරන් මාරු කර යවා ඇති බැවින් ඒ නිසාවෙන් දුම්රිය එන්ජින් රියදුරන් අතර නොසන්සුන්තාවක් ඇති කොට වෘත්තිය ක්‍රියාමාර්ගයකට යොමු කිරීමට පාලනාධිකාරිය උත්සහ කරන බව ලොකොමොටිව් ඔපරේටිං ඉංජිනේරු සංගමය සිය ලිපියෙන් දන්වා තිබෙනවා.
