බලපත්‍ර සහිතව සතුන් ප්‍රවාහනය කරමින් තිබූ ලොරි රථයක් නවතා සත්ත්ව හිංසාව යටතේ නඩු පවතින බවට බියගන්වා රුපියල් එකොළොස් දහසක මුදලක් බලෙන් ලබාගත් බව කියන පොලිස් සැරයන් දෙදෙනෙක් සහ කොස්තාපල්වරුන් දෙදෙනෙකුගේ වැඩ තහනම් කළ බව තංගල්ල ජ්‍යෙෂ්ඨ පොලිස් අධිකාරී කාර්යාලය පවසනවා.
මෙලෙස වැඩ තහනමට ලක් කර ඇත්තේ, වීරවිල පොලිසියට අනුයුක්තව රාජකාරිය කළ පොලිස් සැරයන් දෙදෙනෙක් සහ කොස්තාපල්වරු දෙදෙනෙක්.
පොලිසිය පවසන්නේ, මෙම නිලධාරින් සිව්දෙනා ඉකුත් (10) දින වීරවිල හුළංනුගේ ප්‍රදේශයේදී සතුන් ප්‍රවාහනය කරමින් තිබූ බලපත්‍ර සහිත මෙම ලොරි රථය නවතා පරීක්ෂා කර ඇති බවයි.
එහිදී මෙම නිලධාරීන් ලොරි රථයේ සිටි පුද්ගලයන්ට සත්ව හිංසාව යටතේ නඩු පවරන බවට බියගන්වා මෙම මුදල් බලෙන් ලබාගෙන ඇති බව පොලිසිය අනාවරණය කරගෙන තිබෙනවා.
