ජිනීවා හි එක්සත් ජාතීන්ගේ ගොඩනැගිල්ල ඉදිරිපිට අඩ නිරුවත් වූ යුක්‍රේන ක්‍රියාකාරී තරුණියන් දෙදෙනෙක් විරෝධතාවයක නිරතව තිබෙනවා.
ඔවුන් දෙදෙනා මෙලෙස අඩ නිරුවතින් මෙම විරෝධතාවයේ නියැලී ඇත්තේ, යුක්‍රේනයට ප්‍රහාර එල්ල කරන රුසියාවට හා එක්සත් ජාතීන්ට විරෝධය පළ කරමින් බවයි එරට මාධ්‍ය වාර්තා කළේ,
එහිදී මෙම තරුණියන් දෙදෙනා එක්සත් ජාතීන්ගේ ගොඩනැගිල්ල ඉදිරිපිට ඇති “කැඩුණු පුටුව” ස්මාරකයට හානි කර ඇති බව විදෙස් මාධ්‍ය වාර්තා කළා.
මෙම ස්මාරකය බිම් බෝම්බ සහ පොකුරු බෝම්බවලට එරෙහි විරෝධය සංකේතවත් කරන ලෙස ඉදිකර තිබෙනවා.
ඔවුන් දෙදෙනා විසින් අත් කියතක් සහ යාන්ත්‍රික කියතක් භාවිත කරමින් ස්මාරකය කපා දමා ඇති අතර, තවද තීන්ත වර්ග ස්ප්‍රේ කරමින් ඊට හානි සිදුකර තිබෙනවා.
කෙසේවෙතත් විරෝධතාවයේ නිරත තරුණියන් දෙදෙනා පවසා ඇත්තේ, රුසියානු හමුදාව යුක්‍රේනයට ප්‍රහාර එල්ල කිරීම සඳහා පොකුරු බෝම්බ සහ පුද්ගල නාශක බිම්බෝම්බ භාවිත කරන බවයි.
මේ අතර ස්මාරකයට හානි කිරීම සම්බන්ධයෙන් අදාළ තරුණියන් දෙදෙනා ජිනීවා පොලිසිය විසින් අත්අඩංගුවට ගෙන තිබෙන බව වැඩිදුරටත් සඳහන්.
