තිස්සමහාරාම වැවේ, චීන – ශ්‍රී ලංකා හවුල් සමාගමක් විසින් සිදුකර ගෙන යනු ලබන වැලි සහ මඩ ඉවත් කිරීමේ ව්‍යාපෘතිය අත්හිටුවා තිබෙනවා.
එම ව්‍යාපෘතිය සමාජයේ දැඩි කතාබහකට තුඩුවූයේ එහි සේවය කරන චීන ජාතිකයන්ගේ හැඳ පැළඳ සිටි විශේෂ ඇඳුම් හේතුවෙන් සහ මෙම ව්‍යාපෘතිය සම්බන්ධයෙන් පුරාවිද්‍යා දෙපාර්තමේන්තුවන් පූර්ව අවසරයක් ගෙන නොමැති බව හෙළිවීම නිසායි.
කෙසේ වෙතත්, නිසි අවසරයක් ලබා ගන්නා තුරු අදාල ව්‍යාපෘතිය අත්හිටවීමට උපදෙස් ලබාදුන් බව පුරාවිද්‍යා අධ්‍යක්‍ෂ ජනරාල් ජ්‍යෙෂ්ඨ මහාචාර්ය අනුර මනතුංග මහතා පවසනවා.
මෙවැනි කාර්‍යයක් සඳහා පුරාවිද්‍යා දෙපාර්තමේන්තුවන් ලිඛිත අවසරයක් ලබාගත යුතු බවත් මෙම ව්‍යාපෘතිය හරහා යම්කිසි පුරාවිත්‍යාත්මක හානියක් වී ඇත්දැයි තක්සේරුවක් කිරීමට බලාපොරොත්තු වන බවත් ඒ මහතා පවසනවා.
මේ අතර, තිස්සමහාරාම වැව යනු ඓතිහාසික වටිනාකමකින් යුත් සුවිශේෂී වැවක් බවත් එහි පෞරානික පුරාවිද්‍යා වස්තූන් තැන්පත්ව තිබීමට ඉඩ ඇති බවත් පුරාවිද්‍යාව පිළිබඳ ජ්‍යෙෂ්ඨ මහාචාර්ය රාජ් සෝමදේව මහතා පෙන්වා දෙනවා.
තිස්සමහාරාම වැව යනු ඓතිහාසික වටිනාකමකින් යුත් සුවිශේෂී වැවක් බවයි පුරාවිද්‍යාව පිළිබඳ ජ්‍යෙෂ්ඨ මහාචාර්ය රාජ් සෝමදේව පැවසුවේ.
