ඇමෙරිකානු ඩොලර් මිලියන 55ක් වැයකොට ඉන්දියාවෙන් යල සහ මහ කන්නයට ගෙන්වීමට නියමිත යූරියා මෙටි්‍රක් ටොන් 65,000ක් ප්‍රමිතියෙන් බාල තත්ත්වයේ පවතින බව ජනතා විමුක්ති පෙරමුණේ නායක, පාර්ලිමේන්තු මන්ත්‍රි අනුර කුමාර දිසානායක පවසනවා.
ISO 2018: 2014 ප්‍රමිතියට අනුව අදාළ පොහොරවල 1%ක් විය යුතු බයියුරේට් (Biuret) ඉන්දියානු ප්‍රමිතිය අනුව 1.5%ක් බවත් එය මෙරට වගාවන්වලට නුසුදුසු බවත් ඔහු පවසනවා.
එමෙන්ම, ඇමෙරිකන් ඩොලර් මිලියන 55ක් වැය කොට අදාළ පොහොර තොගය ගෙන්වීමට නියමිත අතර මෙම නොගැළපෙන සංයුතිය පිළිබඳව කාරණයට විශේෂ කැබිනට් අනුමැතියක් ලබා ගැනීමට සූදානමක් පවතින බවත් මන්ත්‍රිවරයා පෙන්වා දෙනවා.
මෙම පොහොර මෙටි්‍රක් ටොන් 65,000 ගෙන්වන්නේ ඉන්දියානු රේඛීය ණය ක්‍රමයෙන් (Credit Line) වන බවයි ඒ මහතා පවසන්නේ.
මේ සඳහා 1988 අංක 68 දරන පොහොර විධිමත් කිරීමේ පනතට අනුව කටයුතු කළ යුතු බවත් ශ්‍රී ලංකා ප්‍රමිති ආයතනය විසින් මෙහි ප්‍රමිති අනුගමනය කළ යුතු බවත් ඔහු අවධාරණය කර සිටිනවා.
“මේවා ගොයම්වලටයි බඩඉරිඟුවලට විතරක් දාන්න කියලා කැබිනට් පත්‍රිකාවේ තියෙනවා. ඒ වගේම මෙය පැළ ගොයමට ගැහුවොත් මුල් කුණු වෙනවා කියලා කෘෂි විද්‍යාඥයෙක් මා සමඟ කිව්වා” යැයි හෙතෙම වැඩිදුරටත් පවසනවා.
