රාජාංගනයේ සද්ධාරතන හිමියන් සංඝභාවයෙන් නෙරපා හැරීමට ශ්‍රී ලංකා රාමඤ්ඤ මහා නිකාය තීරණය කර තිබෙනවා.
ඊට අදාළ නියෝගය ලිඛිතව ආරක්ෂක අමාත්‍යාංශය , බුද්ධශාසන අමාත්‍යාංශය ඇතුළු ආයතන වෙත යොමු කර ඇති බව ජනාධිපති නීතිඥ අනුර මැද්දගොඩ මහතා ඇතුළු නීතිඥ මඩුල්ල කොටුව මහේස්ත්‍රාත් අධිකරණයට අද (02) දැනුම් දී ඇති බවයි වාර්තා වෙන්නේ.
රාජාංගනය හාමුදුරුවෝ නමින් යූ ටියුබ් චැනල් පවත්වාගෙන යමින් අසභ්‍ය ප්‍රකාශ සිදු කිරීම හේතුවෙන් රාජාංගනයේ සද්ධාරතන හිමියන්ට පසුගිය ජනවාරි මස චෝදනා පත්‍ර ලබා දී විද්වත් මහාසංඝයා වහන්සේ සිව් නමක් ඉදිරියේ පසුගිය පෙබරවාරි 25 වන දින විනය කමිටුවට ඉදිරිපත් කර තිබුණා.
ඉන් වැරදිකරු කෙරුණු සද්ධාරතන හිමියන් භික්ෂු භාවයෙන් නෙරපා හැර ඇතැයි ජනාධිපති නීතිඥ වරයා අධිකරණයට දන්වා තිබෙනවා.
අසභ්‍ය ප්‍රකාශ සිදු කිරීම සහ ආගමික සහජීවනයට බාධා වන අයුරින් ප්‍රකාශ නිකුත් කිරීම යන චෝදනාවලට මින් පෙර මෙම හිමියන් අත්අඩංගුවට ගෙන අධිකරණයට ඉදිරිපත් කළ අතර පසුව දැඩි ඇප කොන්දේසි මත මුදා හැර තිබුණා.
