ශ්‍රී ලංකා විවෘත විශ්වවිද්‍යාලයේ නව උප කුලපති ධුරය සඳහා සුදුසුකම්ලත් ආචාර්‍යවරුන් පත්කිරීම ජනාධිපති ගෝඨාභය රාජපක්ෂ ප්‍රතික්ෂේප කර තිබේ.
මේ බව විශ්වවිද්‍යාල ප්‍රතිපාදන කොමිෂන් සභාව මගින් විශ්වවිද්‍යාල පරිපාලනය වෙත දැනුම් දී තිබේ.
නව උප කුලපතිවරයෙකු පත්කිරීම පිළිබදව විශ්වවිද්‍යාල ප්‍රතිපාදන කොමිසමෙන් නිකුත් කරන ලද උපදෙස් අනුව තෝරාගත් තිදෙනෙකුගේ නම් මෙසේ ජනාධිපතිවරයා වෙත යවා තිබිණි.
මහාචාර්ය අජිත් දොළගේ, මහාචාර්ය ශිරෝණිකා කරුණානායක සහ මහාචාර්ය ලාල් තිලකරත්න එසේ තෝරාගත් ආචාර්යවරු වෙති. මේ ධුරය සඳහා 5 දෙනෙකු අයැදුම්පත් යොමුකර තිබූ බවත්, ඒ අතරින් තිදෙනෙකු තෝරාගැනුණු බවත් විවෘත විශ්වවිද්‍යාලයේ ජ්‍යේෂ්ඨ ආචාර්යවරු සඳහන් කරති.
විශ්වවිද්‍යාලය මගින් අදාළ නම් නිර්දේශ කොට විශ්වවිද්‍යාල ප්‍රතිපාදන කොමිසම වෙත යැවීමෙන් පසු, ජනාධිපතිවරයා වෙත අදාළ නම් ඉදිරිපත් කිරීම සිදුවේ.
උප කුලපතිවරයා පත්කිරීමේ අවසාන බලය ඇත්තේ ජනාධිපතිවරයාටය.
විශ්වාස කටයුතු ආරංචි මාර්ග සඳහන් කරන්නේ බාහිර පුද්ගලයෙකු මේ තනතුරට පත්කිරීමේ සූදානමක් ඇති බවත්, එම නිසා මෙසේ සුදුසුකම්ලත් තිදෙනාම ප්‍රතික්ෂේප කර ඇති බවත්ය.
