5 වතාවක් මෙරට අග්‍රාමාත්‍ය ධූරයට පත්වූ රනිල් වික්‍රමසිංහ මහතාගේ යම් අඩුපාඩු තිබුණද ඔහු මෙරට දේශපාලනයෙන් ඉවත් කළ නොහැකි සුවිශේෂී චරිතයක් බවත් ඔහු සිය බල පරාසය තුල මෙරට වෙනුවෙන් යුතුකම් ඉටු කර ඇති බවත් නාරාහේන්පිට ශ්‍රී අභයාරාම පුරාණ විහාරස්ථානයේ විහාරාධිපති බස්නාහිර පළාත් ප්‍රධාන සංඝනායක, අති පූජ්‍ය මුරුත්තෙට්ටුවේ ආනන්ද නායක ස්වාමින් වහන්සේ පවසනවා.
ඒ අද (23) දින හිටපු අග්‍රාමාත්‍ය, වත්මන් පාර්ලිමේන්තු මන්ත්‍රී රනිල් වික්‍රමසිංහ මහතා සිය පාර්ලිමේන්තු මන්ත්‍රීධූරයේ දිවුරුම්දීමෙන් අනතුරුව උන්වහන්සේ බැහැදැකීමට අභයාරාමය වෙත පැමිණි අවස්ථාවේදීයි.
මහින්ද රාජපක්ෂ මහතාගේ ශරීරයත් රනිල් වික්‍රමසිංහ මහතාගේ මොළයත් එක් කළ විට පරිපූර්ණ නායකයෙකු බිහිවන බවත් රනිල් වික්‍රමසිංහ මහතා අනිවාර්‍යයෙන්ම පාර්ලිමේන්තුවේ සිටිය යුතු අයෙකු බවත් උන්වහන්සේ පෙන්වා දෙනවා.
මේ රටේ ජනතාව විශාල බලාපොරොත්තුවක් ඇතිව නායකයෙකු පත් කර ගත්තද ඒ ජනතාවම අද උන්වහන්සේටත් එම පාලකයන් ගැන චෝදනා එල්ල කරන බවත් සමස්ත අමාත්‍ය මණ්ඩලයම ප්‍රාණ ඇපකරුවන් බවට පත්ව ඇති බවටත් පවසන උන්වහන්සේ වැඩිදුරටත් පවසා සිටින්නේ පක්ෂ දේශපාලනයෙන් තොරව රනිල් වික්‍රමසිංහ මහතාව පුද්ගලයෙකු වශයෙන් අගය කරන බවයි.
