කොළඹ, කොටුව ජනාධිපති මන්දිරයට පසුගිය සෙනසුරාදා බලහත්කාරයෙන් ඇතුලූවීමට උත්සාහ දැරූ විරෝධතාකරුවන්ට යුධ හමුදා භට පිරිස් හිතාමතා හානිකිරීමේ අරමුණින් වෙඩි තැබූ බවට ප්‍රචාරය වන වීඩියෝ පට කිහිපයක් සම්බන්ධයෙන් ශ්‍රී ලංකා යුද්ධ හමුදාව කරුණු පැහැදිලි කර තිබෙනවා.
මෙම සමාජ මාධ්‍ය පුවත් යුද්ධ හමුදාව තරයේ ප්‍රතික්ෂේප කරන අතර, විරෝධතාකරුවන් එම පරිශ්‍රය වෙත ඇතුලූවීම වැළැක්වීම උදෙසා අහසට මෙන්ම ජනාධිපති මන්දිරයට ඇතුලූවන ප්‍රධාන ගේට්ටුවේ පැති බැම්මට වෙඩි ප්‍රහාර කිහිපයක් තැබීමට සිදුවූ බවයි යුධ හමුදාව නිවේදනය කලේ.
අහසට වෙඩි තැබීම සහ ගේට්ටු පැති බැම්මට වෙඩි තැබීම, වළක්වාලීමේ උපක්‍රමයක් ලෙස භාවිතා කළ අතර එය කිසිසේත්ම විරෝධතාකරුවන්ට ශාරීරික හානියක් සිදුකිරීම සඳහා ගත් පියවරක් නොවන බව යුද්ධ හමුදාව අවධාරණය කර සිටිනවා.
