ශ්‍රී ලංකාව සතු වටිනා භූ සම්පත්වලින් නිසි ප්‍රයෝජනයක් ගැනීමට භූ විද්‍යා සමීක්ෂණ හා පතල් කාර්යාංශයත්, ලංකා ඛනිජවැලි සමාගමත් අසමත් වී ඇතැයි පරිසර අමාත්‍ය මහින්ද අමරවීර මහතා පවසනවා.
අමාත්‍යවරයා සදහන් කරන්නේ මේ හේතුවෙන් රටට විදේශ විනිමය විශාල ප්‍රමාණයක් අහිමි වන බවයි.
ඇතැම් පුද්ගලයන් හා සමාගම් භූ විද්‍යා සමීක්ෂණ හා පතල් කාර්යාංශය මගින් ගවේෂණ බලපත්‍ර ලබාගෙන වසර 10ක් පමණ ගතව ඇතත් එම ගවේෂණ කටයුතු විධිමත්ව හා කාර්යක්ෂමව සිදු නොකෙරෙන බව අමාත්‍යවරයා පෙන්වා දෙනවා.
එම අවිධිමත් ක්‍රියාමාර්ග හේතුවෙන් ශ්‍රී ලංකාව නිධානයක් මත සිට ගෙන හිඟාකන රටක් බවට පත්ව ඇති බවයි අමරවීර මහතා පවසන්නේ.
ශ්‍රී ලංකාවේ වටිනා භූ සම්පත් ඇති ස්ථාන හඳුනා ගැනීම සඳහා දැනට සිදුකෙරෙන ගවේෂණ කටයුතු කඩිනම් කරන ලෙස එම ආයතනවලට උපදෙස් දී ඇති බව අමාත්‍යවරයා සදහන් කරනවා.
භූ විද්‍යා සමීක්ෂණ හා පතල් කාර්යාංශය සහ ශ්‍රී ලංකා ඛනිජවැලි සමාගමේ නිලධාරින් සමග පැවැත් වූ සාකච්ඡාවකදී මහින්ද අමරවීර මහතා මෙම අදහස් පලකළා.
මෙහිදී වැඩිදුරටත් අදහස් දක්වමින් අමාත්‍යවරයා පවසා සිටියේ ගෑස් නැවකින් ගෑස් මිල දී ගැනීම සඳහා ඩොලර් මිලියන 8ක් වැනි මුදලක් සොයා ගැනීමත් රජයට අපහසු වී ඇති සමයක රටට ඇති වටිනා භූ සම්පත්වල නිසිඵල ලබා ගන්නට භූ විද්‍යා සමීක්ෂණ හා පතල් කාර්යාංශයටත්, ලංකා ඛනිජවැලි සමාගමටත් නොහැකි වී තිබීම කණගාටුවට කරුණක් බවයි.
