පොළොන්නරුව වැලිකන්ද ප්‍රදේශයේ නිවසක ගෑස් සිලින්ඩරයක් පිපිරීමෙන් බරපතළ තුවාල ලබා කොළඹ ජාතික රෝහලේ ප්‍රතිකාර ලබමින් සිටි 19 හැවිරිදි විවාහක කාන්තාවක් ඊයේ (25) පස්වරුවේ ජීවිතක්ෂයට පත්ව තිබෙනවා.
මෙලෙස මියගොස් ඇත්තේ වැලිකන්ද, සඳුන්පිටිය ප්‍රදේශයේ පදිංචි අයේෂා කුමුදුනී නමැති කාන්තාවක්.
පසුගිය නොවැම්බර් 13 වැනිදා ඇය ගෑස් සිලින්ඩරය ගිනිකූරක් යොදා දල්වා ගැනීමට යාමේදී එය පුපුරා ගොස් ඇති බව පරීක්ෂණවලදී අනාවරණය වී තිබේ.
සිද්ධිය වන අවස්ථාවේ නිවසේ වෙනත් කිසිවකු සිට නොමැති අතර, සිද්ධියෙන් පසු අසල්වාසීන් විසින් ඇය වැලිකන්ද රෝහලට ඇතුළත් කර තිබෙනවා.
මියගිය කාන්තාවගේ පියා පවසන්නේ පසුගියදා රැගෙන ආ ගෑස් සිලින්ඩරයක් පුපුරා යාමෙන් මෙම සිද්ධිය සිදුව ඇති බවයි.
මේ සම්බන්ධයෙන් විශේෂ පරීක්ෂණයක් පවත්වන ලෙස ඔහු අදාළ බලධාරීන්ගෙන් ඉල්ලා සිටිනවා.
මේ අතර දිවයින පුරා ස්ථාන රැසක ගෑස් කාන්දු හේතුවෙන් සිදුවන පිපිරීම් වාර්තා වනවා.
කෙසේ නමුත් මේ සම්බන්ධයෙන් බලධාරීන් තවමත් නිසි ක්‍රියාමාර්ගයක් හෝ ප්‍රකාශයක් සිදු නොකිරීමද විශේෂත්වයක්.
